Ditën e sotme, që prej orës 08.30 do të nisë në Gjykatën e Posaçme rivlerësimi i masës së sigurimit personal dhënë për 8 të pandehurit e dosjes, ku janë të vënë në pranga edhe kryebashkiaku i Tiranës, Erion Veliaj dhe biznesmeni Elman Albule.
Bashkë me ta në gjykatë do të jenë edhe 5 biznesmenë shqiptarë, të cilët sipas dosjes, kanë bashkëpunuar në kryerjen e veprave penale nga ana e kreut të Bashkisë.
Po ashtu, në GJKKO do të paraqitet edhe bashkëshortja e kryebashkiakut, Ajola Xoxa, e cila është lënë në masë sigurimi paraprak “arrest shtëpie”.
Në lidhje me këtë grup që kanë bashkëpunuar në korrupsion dhe pastrim arash, mësohet se është vënë nën hetim dhe deputetja e Partisë Socialiste, njëherësh kryetare e Komisionit të Ligjeve, Klotilda Bushka, për të cilën është ngritur një akuzë e veçantë prej pjesës tjetër.
Veliaj, akuza prokurorit të çështjes: Sajime nga një individ pervers
Në pritje të vlerësimit të masës së sigurisë, nga ambientet e bllokut të sigurisë ku po qëndron i izoluar prej së hënës, kryetari i Bashkisë së Tiranës, Erion Veliaj reagoi edhe dje lidhur me situatën në të cilën është përfshirë dhe akuzat e ngritura nga SPAK.
Në një mesazh në rrjetet sociale, Veliaj u rrëfye se e ka kaluar natën e parë në qeli pa gjumë, i shkëputur nga familja dhe djali i tij. Ai akuzoi prokurorin e çështjes për fabrikim të provave dhe për një qasje të njëanshme ndaj tij dhe bashkëshortes. Veliaj tregon së pari përjetimet e 20 orëve të para në paraburgim.
“Natën e parë në qeli, i marrë forcërisht larg familjes dhe me idenë që sot në mëngjes im bir nuk do të shkonte në shkollë as me mua, as me të ëmën, e kam kaluar pa gjumë në sy. I vetmi ngushëllim ishte që nuk mund të shihja dhe as dëgjoja qenërinë, që me siguri më është vërsulur mbrëmë në studiot e kafshimeve dhe jargëve televizive”, – deklaroi kryebashkiaku i Tiranës. Më tej, duke folur për akuzat që përmban dosja e SPAK, ai thekson dhe njëherë se ato janë të pavërteta, ndërsa nuk kursen aspak fjalorin për prokurorin e çështjes. “Ndjesë për çfarë ju kanë dëgjuar veshët dje deri vonë dhe sot që në sabah në ato kanale gjirizi. Por, dua të jini të sigurt se historia që po më tregon mua si një kriminel të korruptuar, i cili ka fshehur pasuri dhe pastruar para bashkë me të shoqen, është e sajuar nga një individ pervers, prokurori i çështjes tonë”, – theksoi Erion Veliaj.
Në reagimin e vet flet edhe për pretendimet konkrete të ngritura nga SPAK në dosje, siç është edhe ajo për shpenzimet e bashkëshortes së tij për veshje e bizhuteri.
“Ai, për shembull, ka shkruar në akt-akuzën haluçinante se ime shoqe ka harxhuar mbi gjysmë milionë euro për blerje online fustanesh dhe bizhuterish. Ky pervers, që më pyeste mua për fustanet e gruas dhe më tregonte gjatë marrjes në pyetje se si shkonte kontrollonte gruan e tij në punë, nuk ka dashur t’ia dijë për shpjegimet e mia dhe të sime shoqeje. Blerjet online janë të gjitha të deklaruara dhe në një shumë disa herë më të vogël, janë bërë për shfaqjet artistike të fondacionit kulturor të sime shoqeje. Faturimi i asaj shume në një akt-akuzë, si një lumë parash i derdhur për luks, është një perversitet kriminal”, shprehet Erion Veliaj. Për të vërtetuar këtë pretendim, Veliaj sjell në vëmendje se gjatë kontrolleve të ushtruara në shtëpinë e tij nuk është gjetur asnjë gjë që të faktojë këto akuza të SPAK. “Kur i thosha se kjo ishte e vërteta dhe kur, në fakt, në shtëpinë tonë nuk ka gjetur as fustane mijëra euroshe, as bizhuteri me ndonjë vlerë të veçantë, ai zvarranik, si i dalë nga qenefët e dikurshëm të Sigurimit të Shtetit zgërdhihej dhe më tregonte se si i binte violinës kur ishte i vogël”,- shprehet kreu i Bashkisë së Tiranës. Kryetari i Bashkisë së Tiranës u arrestua të hënën nga SPAK, i cili e akuzon për korrupsion dhe pastrim të produktit të veprës penale.
