Ditën e Hënë moti parashikohet të jetë i kthjellët dhe me vranësira të pakta kalimtare gjatë ditës, si dhe shtim të vranësirave nga orët e mbrëmjes.
Ditët e Martë e Mërkurë, moti parashikohet me alternime kthjellimesh e vranësirash kryesisht nga orët e mesditës ku pritet të shoqërohen me reshje shiu, të cilat pritet të jenë prezente fillimisht përgjatë vijës bregdetare e më pas për t’u shtrirë kryesisht në jug e pjesërisht në qendër, ku reshjet parashikohen të jenë me intensitet të ulët e lokalisht mesatare, kryesisht në jug si dhe reshje bore me intensitet të ulët në relievet malore.
Për ditën e Enjte moti parashikohet të jetë i vranët si dhe intervale kthjellimesh. Vranësirat nga orët e mesditës e pasdite do të shoqërohen me reshje shiu me intensitet të ulët, fillimisht përgjatë vijës bregdetare e më pas për t’u shtrirë në pjesën më të madhe të territorit. Reshjet në zonën e veriperëndimit e pjesërisht në qendër nga orët e mbrëmjes, parashikohen të jenë me intensitet hera-herës mesatar në formën e shtrëngatave afatshkurtra.
Ndërsa për ditën e Premte moti parashikohet i vranët, si dhe altrenime të herëpashershme kthjellimesh. Reshjet e herëpashershme me intensitet të ulët, parashikohen të jenë prezente që në orët e para të 24- orëshit, ku në veri e pjesërisht në qendër parashikohen të kenë hera-herës intensitet deri mesatar. Në lartësitë mbi 700-800m, pritet të ketë reshje bore me intensitet të ulët.
Era parashikohet të fryjë me drejtim Juglindje-verilindje, kryesisht ditët e Enjte e Premte me shpejtësi 8m/sek, ndërsa përgjatë vijës bregdetare e lugina në momentin e formimit të vranësirave, era fiton shpejtësi deri në 20m/sek.
