Tre parkime në Durrës do t’u nënshtrohen ndryshimeve në rehabilitim dhe vendosje pajisjesh pagese automatike si pjesë e nismës së Bashkisë.
Për procedurën në fjalë tashmë autoriteti kontraktor ka shpallur edhe kompaninë fituese “Adi Professional” që do të zbatojë këtë kontratë me objekt “Furnizim, vendosje pajisjesh për parkimet publike në qytetin e Durrësit”.
Në dokumentet e vëna në dispozicion më herët për këtë procedurë, bashkia pranonte se aktualisht të tre sheshet në qytet shërbejnë si parkime publike por nuk kanë rrethim, kanë nevojë për ndërhyrje në rehabilitim të shtresave dhe vijëzim si dhe për vendosje të pajisjeve që lidhen me pagesën.
Parkimet ndodhen në disa zona të qytetit dhe për të cilat Bashkia specifikon edhe gjendjen e tyre ekzistuese.
Sheshi i parkimit te Muzeu i Dëshmorëve
Ky shesh ka nevojë për rehabilitim dhe vijëzim të vend parkimeve sipas përmasave standarde të përcaktuara në legjislacion. Gjithashtu ka nevojë për ndërhyrje në përmirësimin e shtresave dhe rrethimit për të rritur sigurinë në parkim.
Sheshi i parkimit te Pallati i Sportit “Ramazan Njala”
Ky shesh ka nevojë për rehabilitim dhe vijëzim të vend parkimeve sipas përmasave standarde të përcaktuara në legjislacion. Gjithashtu ka nevojë për ndërhyrje në përmirësimin e shtresave dhe rrethimit për të rritur sigurinë në parkim.
Sheshi i parkimit te Shëtitorja Taulantja
Ky shesh aktualisht ka vijëzim të vend parkimeve sipas përmasave standarde të përcaktuara në legjislacion. Ka nevojë për ndërhyrje në përmirësimin e shtresave dhe rrethimit për të rritur sigurinë në parkim.
/Monitor
