Rastet e fundit të dhunës në kopshte e çerdhe të denoncuara nga vetë prindërit kanë rikthyer frikën dhe ankthin te këta të fundit. Ata thonë se fenomene të tilla ndodhin shpesh në kopshte por përpiqen të monitorojnë çdo ditë mbarëvajtjen e fëmijës. Kërkojnë që të shtohen kontrollet dhe të merren masa për përjashtimin e edukatorëve dhunues.
Ekspertët pohojnë se infrastruktura e kopshteve dhe procesi joefikas i rekrutimit të këtyre punonjësve janë disa nga faktorët që shpien në dhunë. Për Ndriçim Mehmetin edukatorët duhet të kenë përgatitje të veçantë sidomos për edukimin dhe rritjen e më të miturve.
Ndërkohë çdo vit nga universitetet dalin me dhjetëra të rinj të diplomuar për edukim, ku një pjesë e tyre nxitojnë t’i drejtohen portalit për punësim.
Për Erion Muçën, ekspert i punësimit, problematika e rekrutimit të edukatorëve nis me mungesën e studimit të nevojës që ka tregu për edukatorë, për ti shpërndarë ato në mënyrën e duhur, e po ashtu si problem sheh edhe varësinë e këtyre institucioneve jo nga ministria e arsimit por nga bashkitë.
Një vit më parë, një 3-vjeçare e dhunuar nga edukatorja e saj në një kopsht privat, tronditi mbare opinionin publik. U desh denoncimi i familjarëve nga Spitali i Traumës, për gjymtyrët e thyera që institucionet përgjegjëse të reagonin.
Ministria e Arsimit, mbylli kopshtin dhe premtoi kontrolle në të gjitha institucionet publike dhe private
Por, pas një viti ende nuk kemi një raport në lidhje me kontrollin e ushtruar në institucionet e ciklit parashkollor, sa prej tyre përmbushin standardet dhe sa të tjerë janë mbyllur.
Të pyetur nga A2 CNN, zyra e shtypit e ministres së Arsimit thotë se përgjegjëse për këto monitorime është Agjencia Kombëtare e Arsimit Parauniversitar.
Për sa kohë që ministria vendos të heshtë , ashtu si në rastin e shkollës Fan Noli” prindërit do të jenë të pasigurt për fëmijët e tyre në kopshte e shkolla, e ndoshta do t’i shohim më shpesh si protestues në dyert e ministrisë./A2CNN
