Analisti Andi Bushati ka folur në Syri tv për zhvillimet politike, pas denoncimeve të ish-zëvendëskryeministrit Arben Ahmetaj, ku akuzonte Edi Ramën dhe ministrat e tij, veçanërisht Belinda Ballukun, për korrupsion dhe lidhje me krimin.
Sipas Bushatit, duket se ka një koherencë mes qeverisë dhe organeve të drejtësisë për ta kaluar në heshtje këtë ngjarje.
Analisti ngriti më tej pyetjen se pse Ahmtaj është i vetmi nga socialistët e burgosur dhe nën hetim që po flet, duke ngritur dyshimet se të tjerët janë sërish pengje të Edi Ramës, dhe ish-zv. kryeministri është i vetmi që i ka shpëtuar.
Bushati: Duket sikur ka një koherencë veprimesh mes qeverisë dhe organeve të drejtësisë për ta kaluar në heshtje këtë ngjarje. Kur flasim për drejtësinë tonë të re, për SPAK për GJKKO, bëjmë bilancin sasior, sa zyrtarë të lartë kanë përfunduar në burg dhe sa janë zyrtarë të lartë janë mbrapa hekurave. Kur themi këtë duhet të shohim dhe diçka tjetër që duket paradoksale.
Si shpjegohet se të gjithë ata që janë sot në burg që SPAK dhe gjykata i kanë prangosur dhe burgosur, asnjëri prej tyre nuk flet, i vetmi që ka folur është Arben Ahmetaj që po dëshmon. A kemi ne një drejtësi që i jep mundësinë Ahmetajt dhe të tjerëve të bëjnë të penduarin, të tregojnë të vërtetën totale për atë që ka ndodhur, për koncesionet, për inceneratorët, për mënyrën se si është qeverisur ky vend.
Duket se ata që janë të burgosur janë prap pengje të atij që i ka komanduar edhe kur ishin në qeveri dhe i vetmi që ka arritur t’i shpëtojë këtij kurthi, na tregon për tunelin e Llogarasë, për hotelet e Ramës, për mënyrën se si bëheshin mbledhjet e qeverisë dhe si merreshin vendimet. Kjo kërcitje lë njollë mbi drejtësinë e re dhe lidhjet e saj me qeverinë.
