Analisti Andi Bushati, i ftuar në emisionin “Të Paekspozuarit”, foli për pezullimin e fondeve të SHBA në botë, akt ky që prek edhe asistencën për SPAK.
Bushati tha se është i habitur nga entuziazmi i opozitës për këtë ngjarje, duke e propaganduar sikur Trump po mbyll SPAK, ndërkohë që deklaroi se ka më shumë gjasa që ky institucion të bjerë totalisht në duart e Edi Ramës, pasi tashmë nuk do të kemi as fasadën e një institucioni të pavarur.
“Nuk e themi dot se çfarë do të bëjë Amerika me SPAK. Ne nuk duhet ta marrim veten si qendrën e botës. Opozita e paraqet sikur u zhduk SPAK, sikur Trump kur ka marrë vendimin ka patur në mendje Shqipërinë, ai nuk e di fare që ekziston SPAK. Dilnin edhe sharlatanët që mbrojnë SPAK, thoshin do ja heqin OJQ-ve, por SPAK-ut nuk ja heqin. Në fakt ky është debat që nuk ka lidhje me Shqipërinë, ka vendim për të gjithë botën.
Pse vjen kjo? Kjo vjen sepse një institucion mashë të pushtetit e kemi shitur si institucion amerikan. Kur kam vajtur unë në SPAK, prokurorja mbante flamur shqiptar dhe amerikan në zyrë. Unë e pyeta, kam ardhur në zyrë të shtetit shqiptar, ç’do flamuri amerikan këtu? Ajo ulte kokën dhe nuk e dinte.
Problemi është, SPAK ka qenë një instrument për të forcuar diktaturën e Ramës, me carta bianca amerikane. Por, amerikanët kishin një lloj fytyre dhe ushtronin një presion. Përshembull, Rama nuk donte ta dorëzonte Beqajn, pati një presion që u dorëzua. Donin ti shërbenin Ramës dhe të ruanin fasadën e pavarësisë.
Në regjimin e Trump, SPAK nuk do të ketë as këtë trysni amerikane. Nga një vegël me fasadë demokratike, do ti bjerë edhe fasada. Më mirë që ata që e shpikën SPAK si vegël e pushtetit të Ramës të vazhdonin ta kontrollin, se tani mund të kemi një vegël pa kontroll, kjo është frika ime”, tha Bushati.
