Edi Rama ka zhvilluar ditën e sotme një takim “kokë më kokë” me homologun grek, Kyriakos Mitsotakis, pas përfundimit të ceremonisë funerale të Kryepeshkopit Anastas Janullatos në Tiranë.
Lajmi bëhet me dije nga mediat greke, të cilat kanë zbuluar se çfarë kanë diskutuar kryeministrat e dy vendeve në takimin që ka zgjatur pak minuta.
“Sigurisht që kemi marrëdhënie të mira dhe duhet të kemi marrëdhënie të mira. Ne jemi shtete fqinje dhe çdo problem duhet ta zgjidhim me dialog”, citohet t’i ketë thënë kryeministri grek Ramës.
Rama nga ana e tij tha për takimin me Mitsotakis:
“Ne jemi miq. Ai erdhi këtu dhe unë kam nderin të jem një mikpritës i mirë. Kështu pimë një kafe, folëm për gjëra të ndryshme dhe nuk kam çfarë të ndaj me ju. Nuk ka asnjë problem. Gjithçka është në rregull”.
Pak ditë më parë, mediat greke raportuan se mes Athinës dhe Tiranës po zhvillohen negociata për zgjidhjen e çështjeve që mbajnë peng marrëdhëniet mes dy vendeve, ku për palën shqiptare është duke negociuar Endri Fuga, një nga njerëzit e besuar të Edi Ramës.
“Kathimerini” zbuloi se qeveria shqiptare ka bërë lëshimin e parë duke pranuar një kërkesë të minoritetit grek që të mund të vetëdeklarohet si i tillë pa pasur nevojë për dokumente shtesë. Madje çdo person që ndihet grek mund ta bëjë këtë në çdo pjesë të vendit dhe jo vetëm në zonat minoritare.
Gjithashtu, Qeveria shqiptare duket se ka marrë përsipër të ndihmojë në zgjidhjen e çështjeve të pronave të minoritetit grek dhe të pranojë aplikimin e gjuhës greke edhe në zonat të ashtuquajtura minoritare ku pakica greke është nën 20% dhe të çojë përpara çështjen e varrezave të ushtarëve të rënë gjatë Luftës së Dytë Botërore.
Nga ana tjetër edhe Athina ka pranuar të bëjë disa lëshime duke nisur me mosbllokimin e hapjes së kapitujve të negociatave për Shqipërinë në Bruksel. Një tjetër çështje që qeveria greke po shtyn është marrëveshja për njohjen e sigurimeve shoqërore.
Në negociata është edhe zgjidhja e çështjes së pronave të komunitetit çam në Greqi dhe heqja e ligjit të luftës. Sipas të njëjtave burime të dyja palët pritet të rinisin diskutimet edhe për kufirin detar.
Zbulon prapaskenat/ “Kathimerini”: Negociata të fshehta mes Tiranës dhe Athinës
