Policia dhe Prokuroria e Tiranës nuk kanë ende një emër për ekzekutimin mafioz që iu bë postierit në derën e shtëpisë së tij në Zall Mner.
Madje deri më tani, grupi hetimor nuk ka asnjë pistë të saktë, ndërkohë që vijojnë të gërmojnë në të shkuarën e viktimës për të mësuar se çfarë ka ndodhur mes tij dhe personave që aktualisht janë të dyshuar. Por përveç një konflikti të shumë viteve më parë mes Lulzim Vishës, viktimës, dhe dy kushërinjve Lami, Ervis dhe Eduart Lami nuk ka asnjë të dhënë tjetër që i implikon të dy personat, banesat e të cilëve u bënë shënjestër e kontrolleve ë imtësishme disa orë pas krimit të rëndë.
Grupi hetimor që ka mundur të sigurojë dëshminë e njërit prej të dyshuarve, nuk është bindur ende të ngre akuzën e pjesëmarrjes në krim, ndërkohë që për Ervis Lamin, të riun problematik, faktohet që nuk ka qenë brenda territorit të Shqipërisë preh disa kohësh.
Megjithatë, emri i tij është futur në listën e personave të kërkuar ndërkombëtarisht, për shkak se në banesën e tij dhe të kushëririt të tij të vënë në pranga janë gjendur armë dhe municione. Edhe pse ende nuk ka dalë përgjigje për armën që u sekuestrua të shtëpitë e Lamëve, policia dhe grupi hetimor kërkojnë shkakun e ekzekutimit mafioz pikërisht te një konflikt që është dëshmuar nga dëshmitarë që i njohin të dyja palët.
Nga dëshmitë është mësuar se ka pasur një konflikt verbal kohë më parë, por asnjë nga familja e viktimës nuk është në gjendje të dëshmojë dyshimet mbi aktin e rëndë të vrasjes në derën e shtëpisë të njeriut të tyre. Policia më në fund ka hapur “letrat” e denoncimeve të mjeteve të vjedhura në vendin tonë dhe ka mësuar të vetmin fakt për atë ngjarje se makina që përdorën autorët në krim ishte vjedhur në Elbasan, pasi atje gjendej edhe denoncimi i pronarit të mjetit luksoz.
Hetime vijojnë
Sipas të dhënave hetimore, vëllai i viktimës, Besnik Visha, i cili është edhe personi “i përfshirë” si shkak i mundshëm për vrasjen e Lulzimit, ka mohuar të ketë pasur ndonjë konflikt me familjen me të cilën ka qenë në probleme hasmërie.
Po ashtu, mësohet se familjarët nuk kanë dhënë asnjë informacion për probleme apo konflikte, ndërkohë që i arrestuari Eduart Lami ka mohuar në mënyrë kategorike të ketë lidhje me vrasjen e Vishës. Po ashtu, ai ka mohuar edhe konfliktin që ka pasur me ta, por grupi hetimor po vijon të kërkojë në këtë konflikt pikërisht motivin e ekzekutimit të pak ditëve më parë, që fillimisht u duk i lehtë për t’u zbardhur, por më pas dëshmoi se vrasja është bërë në mënyrë të organizuar dhe se autorët nuk kanë lënë asnjë gjurmë, as në vendin e ngjarjes dhe as në mjetin me anë të të cilit kanë kryer krimin.
Eduart Lami, që njihet edhe si kushëriri i Ervisit, vijon të jetë në arrest me burg për armëmbajtje pa leje, ndërkohë që prokuroria nuk ka mundur të ngrejë asnjë akuzë tjetër për të. Madje, sipas të dhënave, as armën me silenciator, Eduarti nuk e ka pranuar të jetë e tija, ndërkohë që policia tha se janë sekuestruar edhe një thikë dhe një sëpatë, mjete që gjenden thuajse në çdo shtëpi. Tashmë mbetet të verifikohet më hollësisht objekti i konfliktit mes Lamëve dhe Vishajve për tokën që është bërë objekt sherri, që në fakt, sipas të dhënave rezulton e zgjidhur.
