Shtetet e Bashkuara të Amerikës kanë ndërprerë të gjitha ndihmat për Shqipërinë për njlë periudhë 90 ditore, pas Urdhrit Ekzekutiv të Donald Trump lidhur me ndihmën në vendet e huaja.
Vendimi prek fondet për pothuajse të gjitha institucionet, të gjitha ministritë, Kuvendin, bashkitë dhe për të gjitha institucionet e drejtësisë, mes tyre edhe për Prokurorinë e Posaçme (SPAK) dhe Byronë Kombëtare të Hetimit.
Kjo konfirmohet nga një notë diplomatike që Ambasada Amerikane në Tiranë iu ka dërguar të gjithë institucioneve më të larta shqiptare, ku njoftohet ndërprerja me efekt të menjëhershëm e mbështetjes dhe fondeve.
Partnerët e programit dhe zbatuesit e programeve të asistencës të financuara nga SHBA-të në Shqipëri janë duke u njoftuar për këtë veprim.
Fondet amerikane do të jenë të ndërprera deri në një vendim të dytë, pasi administrata e Trump të ketë vlerësuar efikasitetin dhe “përputhshmërinë me politikën e jashtme të Shteteve të Bashkuara”.
Ambasada e Shteteve të Bashkuara të Amerikës kërkon që ky njoftim të ndahet me të gjitha Ministritë, institucionet dhe entitetet e tjera qeveritare përkatëse që bashkëpunojnë përmes programeve ekzistuese të ndihmës së huaj të SHBA-ve, duke përfshirë:
- Ministria e Financave, përfshirë Agjencinë e Inteligjencës Financiare
- Ministria e Brendshme, duke përfshirë Policinë e Shtetit Shqiptar, Agjencinë e Mbikëqyrjes së Policisë dhe Qendrën e Koordinimit Kundër Ekstremizmit të Dhunshëm.
- Ministria e Bujqësisë dhe Zhvillimit Rural
- Ministria e Drejtësisë, përfshirë Drejtorinë e Përgjithshme të Burgjeve
- Ministria e Mbrojtjes
- Ministria për Evropën dhe Punët e Jashtme
- Ministria e Arsimit dhe Sportit
- Ministria e Turizmit dhe Mjedisit
- Ministria e Shëndetësisë dhe Mirëqenies Sociale
- Ministria e Shtetit për Rininë dhe Fëmijët
- Ministria e Shtetit për Pushtetin Vendor
- Ministria e Ekonomisë, Kulturës dhe Inovacionit
- Ministria e Infrastrukturës dhe Energjisë, duke përfshirë Korporatën Elektroenergjetike Shqiptare (KESH), Operatorin e Sistemit të Transmetimit (OST), Operatorin e Shpërndarjes së Energjisë Elektrike (OSHEE) dhe Bursën Shqiptare të Energjisë (ALPEX)
- Ministria e Shtetit për Administratën Publike dhe Kundër Korrupsionit
- Ministria e Shtetit për Marrëdhëniet me Parlamentin
- Parlamenti, duke përfshirë komisionet e tij
- Këshilli i Lartë Gjyqësor
- Këshilli i Lartë i Prokurorisë
- Gjykata Kushtetuese
- Gjykata e Lartë
- Të gjitha gjykatat, përfshirë gjykatat e apelit, gjykatat administrative të apelit dhe gjykatat e shkallës së parë
- Struktura e Prokurorisë së Posaçme Kundër Korrupsionit dhe Krimit të Organizuar, duke përfshirë Prokurorinë Speciale dhe Byronë Kombëtare të Hetimit
- Gjykata e Shkallës së Parë të Posaçme Kundër Korrupsionit dhe Krimit të Organizuar
- Gjykata e Posaçme e Apelit Kundër Korrupsionit dhe Krimit të Organizuar
- Zyra e Prokurorit të Përgjithshëm
- Inspektori i Lartë i Drejtësisë
- Komisioni i Pavarur i Kualifikimeve, Operacioni Ndërkombëtar i Monitorimit dhe Dhoma e Posaçme e Apelimit
- Autoriteti Kombëtar i Sigurisë Kibernetike (AKSK)
- Agjencia Kombëtare për Shoqërinë e Informacionit (AKSHI)
- Ministria e Shtetit dhe Zyra e Kryenegociatorit
- Agjencia Shtetërore për Programimin Strategjik dhe Koordinimin e Ndihmës (SASPAC)
- Të gjitha pushtetet komunale
Kujtojmë që Departamenti i Shtetit i SHBA-së, më 24 janar, urdhëroi ngrirjen e financimeve të reja për pothuajse të gjitha programet e ndihmës ndërkombëtare amerikane si pjesë e përpjekjes së presidentit Donald Trump për t’i përshtatur këto programe me qëllimet e tij të politikës së jashtme. Këto programe zbatohen kryesisht përmes Agjencisë Amerikane për Zhvillim Ndërkombëtar, USAID.
Sekretari i Shtetit, Marco Rubio, u dërgoi një mesazh ambasadave amerikane në mbarë botën duke sqaruar zbatimin e një urdhri ekzekutiv që Trump e nënshkroi më 20 janar, ku thuhej se “asnjë ndihmë e mëtejshme ndërkombëtare e Shteteve të Bashkuara nuk do të shpërndahet në një mënyrë që nuk është plotësisht e përputhur me politikën e jashtme të presidentit të Shteteve të Bashkuara”.
Ky urdhër i prek shpërndarjet e reja të fondeve për vendet e huaja, OJQ-të, organizatat ndërkombëtare dhe kontraktorët, deri në përfundimin e rishikimeve të programeve.
Kujtojmë se dy ditë më parë, një prej përfaqësueseve të shoqërisë civile në Shqipëri, Iris Luarasi, gjatë një interviste konfirmoi ndërprerjen e fondeve për organizatësn e saj, por ndërkohë mohoi që fondet të ishin ndërprerë për SPAK-un, gjë që rezultoi e pavërtetë.
Iris Luarasi: Nuk garova për drejtoreshë të RTSH, sepse nuk më del rroga! Trump më ndërpreu fondet
