Kryepeshkopi i Kishës Ortodokse Autoqefale Shqiptare, Anastas Janullatos do të prehet në Tiranë
Burime për mediat bëjnë me dije se trupi i Janullatos do të sillet në Shqipëri, pasi ky ishte një amanet i Kryepeshkopit për dekadat që ka kaluar në vendin tonë, ku prej vitit 1992 është vendosur në krye të Kishës Ortodokse Autoqefale.
Gjithashtu është dhe një rregull i Kishës Autoqefale, që Kryepeshkopët të prehen në vendin ku kanë shërbyer, jo në vendin e lindjes.
Ndërkohë pritet mbledhja e Sinodit të Shenjtë për të përcaktuar edhe detajet dhe për të marrë vendimet në lidhje me ceremoninë mortore.
Kryepeshkopi Anastas Janulltos u nda nga jeta në moshën 95-vjeçare në Spitalin “Evangelismos” të Athinës mëngjesin e kësaj të shtune, ku ishte i shtruar prej më shumë se 20 ditësh.
Anastas Janullatos u shtrua fillimisht në një spital në Tiranë më 30 Dhjetor pas një infeksioni të rëndë dhe më 3 Janar kryepeshkopi u transferua drejt Athinës.
Rreth një javë më parë, ai iu nënshtrua një operacioni për ndalimin e gjakderdhjes. Gjatë kësaj kohe dhe pas operacionit, Kryepeshkopi ka qenë në intubim, ku mjekët tentuan ta nxirrnin nga intubimi, por përpjekjet rezultuan të pasuksesshme.
Në këto rrethana, bluzat e bardha vendosën që dy ditë më parë kryepeshkopi t’i nënshtrohej trakeostomisë, që është një procedurë e nevojshme në rastet e intubimit të zgjatur mbi 15-20 ditë. Përmes kësaj procedure kirurgjikale, bëhet një hapje në trake apo në grykë për të krijuar frymëmarrje.
Por, mëngjesin e djeshëm gjendja e tij u përkeqësua ndjeshëm pasi pësoi dështim shumëorganësh, të cilës nuk i mbijetoi dot duke ndërruar jetë.
Anastas Janullatos u caktua në 1991 nga Patriarku Ekumenik Eksark, Patriarkal në Shqipëri. Vizitën e parë në vendin tonë ai e bëri më 16 korrik 1991.
U fronëzua në krye të Kishës Ortodokse Autoqefale Shqiptare më 2 gusht 1992, plot 33 vite më parë në moshën 63 vjeçare duke i rezistuar referendumit të vitit 1994 ku qeveria e atëhershme futi në projektligj një nen që i ndalonte udhëheqësit fetarë me nënshtetësi të huaj të ushtronin detyra fetare. Me 6 nëntor Referendumi u rrëzua me votë popullore.
