Shqipëria ka shansin që ka një mot relativisht të butë gjatë dimrit, përndryshe banorët e saj do të vuanin shumë nga i ftohti.
Eurostat ka publikuar një raport ku ka matur përqindjen e popullsisë që nuk arrin të mbajë shtëpinë mjaftueshëm ngrohtë për vitin 2023.
Shqipëria renditet e para në Europë, ky 37.7% vlerësohen që nuk ngrohin mjaftueshëm shtëpitë e tyre (të dhënat për Shqipërinë janë të vitit 2021), nga 10.6% që është mesatarja europiane. Mungesa e ngrohjes qendrore si dhe përdorimi i energjisë elektrike për ngrohje, që është i shtrenjtë, e bëjnë këtë nevojë jetike një luks për familjet shqiptare.
Vendet e rajonit, për të cilat ka informacion në raport, renditen shumë më mirë se Shqipëria. Në Serbi, një shtet shumë më i ftohtë se ne, vetëm 9.5% e popullatës nuk ngrohin dot shtëpitë (e dhënë e vitit 2022), më e ulët se mesatarja e BE-së. Në Mal të Zi treguesi është 13.9% (viti 2022). Ne Maqedoninë e Veriut, treguesi ishte 23% për vitin 2020.
Bumi i ndërtimeve i viteve të fundit nuk duket se ka ndikuar në përmirësimin e cilësisë së jetesës së familjeve. Të dhënat historike tregojnë se ky tregues është luhatur, midis 35-37% për gjithë periudhën 2017-2021, kur raportohen të dhënat. Madje në 2021, treguesi erdhi në përkeqësim në raport me vitin e mëparshëm, kur kishte zbritur në 35.8%.
Fatmirësisht, Shqipëria ka shumë diell. Sipas të dhënave të meteorologjisë, World Weather Online, Shqipëria ka rreth 2,400 deri në 2,600 orë diell në vit, duke e renditur si një nga vendet me më shumë ditë me diell në Europë, veçanërisht në rajonet bregdetare dhe jugore të vendit. Vendi me më shumë diell në Europë është Spanja, e ndjekur nga Franca dhe Italia.
Europa
Sipas Eurostat, në vitin 2023, 10.6% e popullsisë së Bashkimit Europian nuk ishin në gjendje të mbanin shtëpitë e tyre shumë ngrohtë. Krahasuar me vitin 2022, kjo shifër u rrit me 1.3 pikë përqindje.
Pjesa më e lartë e njerëzve që nuk mundën të mbajnë shtëpitë e tyre të ngrohta u vërejt në Spanjë dhe Portugali (nga 20.8% secila), pasuar nga Bullgaria (20.7%), Lituania (20.0%) dhe Greqia (19.2%).
Nga ana tjetër përqindjet më të ulëta u regjistruar në Luksemburg (2.1%), Finlandë (2.6%), Slloveni (3.6%), Austria (3.9%) dhe Estoni (4.1%).
