Janë zbardhur detaje të reja nga vetëdozimi në Policinë e Shkodrës e 25-vjeçarit Samuel Troshani dhe 24-vjeçarit Izmir Sakica, të cilët ishin shpallur në kërkim për dhunimin me sende të forta të Vladimir Bruçit, ngjarje kjo e ndodhur më 3 Qershor të vitit të kaluar në rrugën “Pogej” të lagjes Rus.
Gazetari i kronikës Eni Ferhati tha në Euronews Albania se në pamjet filmike të kamerave të sigurisë të dhunimit të Vladimir Bruçit, dy të rinjtë shfaqeshin edhe të armatosur, duke e dhunuar nën kërcënimin e armëve.
Sipas tij, kur u dorëzuan në Policinë e Shkodrës, Samuel Troshani dhe Izmir Sakica kanë dorëzuar edhe dy armë, një pistoletë e ngjashme e llojit ”Glock” dhe një armë zjarri e dyshuar automatike, duke pretenduar se janë të njëjtat me ato që shfaqen në pamjet filmike.
Ferhati tha më tej se Troshani dhe Sakica pretendojnë se armët janë sportive dhe nuk përmbushin kushtet teknike për të qenë armë zjarri.
“Si Samuel Troshani, po ashtu edhe Izmir Sakica janë dy personazhe që njihen nga Policia e Shkodrës. Emri i tyre në fakt u bë publik në muajin Qershor, disa muaj para masakrës së Dobraçit, ku këta dy individë në një konflikt me Vladimir Bruçin dhe djalin e tij, i dhunuan ata, madje në pamje të kamerave të sigurisë që ka sekuestruar Policia e Shkodrës në muajin Qershor, ata janë shfaqur edhe të armatosur në konfliktin për parkimin e gabuar, në një prej lagjeve të Shkodrës. Nën kërcënimin dhe të armëve më pas kanë dhunuar edhe Vladimir Bruçin dhe u lëshuan masat arrest me burg në mungesë.
Ata janë dorëzuar në prani të avokatit të tyre dhe e reja nga ajo se çfarë nuk është raportuar deri tani, mund të them që si Samuel Troshani dhe Izmir Sakica, bashkë me dorëzimin e tyre, kanë dorëzuar në Policinë e Shkodrës edhe dy armë zjarri. Armët janë dorëzuar, një pistoletë e ngjashme e llojit ”Glock” dhe një armë zjarri e dyshuar automatike që janë vetëdorëzuar në Policinë e Shkodrës. Pretendohet që janë armë sportive dhe pretendohet se këto armë janë përdorur në konfliktin për të cilën ata kishin një masë sigurie, por nuk janë armë që përmbushin kushtet teknike dhe sipas tyre këto janë armët që shfaqen në pamjet filmike të përplasjes me Bruçin në Qershor të vitit 2024 dhe armët janë sekuestruar.” – tha Eni Ferhati.
Ndërkohë, Samuel Troshani dhe Izmir Sakica ishin shpallur në kërkim policor edhe në lidhje me masakrën me 4 të vrarë të Dobraçit, ku dyshohet se kanë qenë të përfshirë.
Ferhati deklaroi se dy të rinjtë janë marrë në pyetje edhe në lidhje me këtë ngjarje dhe në dëshmitë e tyre kanë dhënë alibi të fortë se nuk kanë qenë në masakrën e Dobraçit, duke treguar se ku ndodheshin në momentin e atentatit.
“Një grup i specialistëve të krimeve kundër jetës dhe personit në drejtorinë e krimeve të rënda në Policinë e Shtetit kanë shkuar në Shkodër dhe deri në orët e mesnatës i kanë marrë në pyetje dy të rinjtë edhe për masakrën e Dobraçit. Dy të rinjtë patjetër e kanë mohuar përfshirjen e tyre, madje ata kanë alibi të fortë që nuk janë të përfshirë në bnë ngjarjen e 30 tetorit të vitit të kaluar me katër viktima pasi kanë dhënë edhe adresat se ku kanë qenë. Nga ana tjetër, policia menjëherë pas masakrës së Dobraçit, këta dy individë i shpalli në kërkim.”, – tha Ferhati.
