Policia ka arrestuar një shtetase turke, në vijim të operacionit të koduar “Escort” të zhvilluar dy javë më parë, pasi akuzohet për shfrytëzim prostitucioni. Në pranga është vënë shtetasja G. Ç., 40 vjeçe, banuese në Turqi, e cila është kapur nga efektivët e Rinasit në aeroport.
Burimet zyrtare raportojnë se 40-vjeçarja në bashkëpunim me shtetasen nga Azerbajxhani A. H. (e arrestuar më herët), rekrutonin shtetase të huaja nga Turqia dhe nga Azerbajxhani, dhe më pas i shfrytëzonin për prostitucion, duke përdorur një faqe online.
Në momentin që vajzat e rekrutuara kërkonin të tërhiqeshin nga ky aktivitet kriminal, tutorja nga Azerbajxhani me anë të fotove të publikuara në këtë faqe, ushtronte presion ndaj tyre.
Më tej, Policia bën me dije se gjatë kontrollit fizik, shtetases turke G. Ç. i janë gjetur bizhuteri floriri dhe rreth 3 mijë euro, të dyshuara të përfituara nga kjo veprimtari e kundërligjshme.
Gjithashtu, në vijim të veprimeve, janë referuar materialet në Prokurori dhe për dy shtetase turke, të dyshuara për ushtrim prostitucioni.
Materialet procedurale i kaluan Prokurorisë së Tiranës, për veprime të mëtejshme.
