Një aksident i frikshëm ka ndodhur pasditen e së enjtes në Tiranë, në zonën e Rrugës së Elbasanit.
Sipas burimeve mediatike, bëhet me dije se dy persona kanë mbetur të plagosur, ndërsa pritet mbërritja e ambulancës.
“Më datë 23.01.2025, rreth orës 16:20, në Rrugën e Elbasanit, shtetasi R.T, rreth 52 vjeç, ka humbur kontrollin mbi drejtimin e automjetit dhe për pasojë automjeti ka dalë nga rruga duke goditur fillimisht shtetasin E. E., rreth 63 vjeç, që lëvizte me biçikletë dhe shtetasen V. S., rreth 18 vjeçe, këmbësore, e më pas u përplas me murin rrethues të një ndërtese (seli diplomatike). Dy shtetasit e dëmtuar ndodhen në spital, nën kujdesin e mjekëve. Grupi hetimor ndodhet në vendngjarje dhe po punon për sqarimin e rrethanave dhe shkakut të aksidentit”, njofton policia.
Siç mund ta shihni nga pamjet video të publikuara nga JOQ, makina ka humbur kontrollin dhe ka përfunduar mbi trotuar. Dyshohet se automjeti gjatë përplasjes ishte duke lëvizur me shpejtësi të lartë, kjo për shkak se barrierat e trotuarit dhe një shtyllë shihet e shkatërruar plotësisht.
