Barcelona gjendet para një dileme shumë të madhe se kush do jetë zëvendësuesi i Robert Lewandowski-t. Edhe pse sulmuesi polak po tregon një perfomancë të lartë këtë sezon dhe mund t’i rinovohet kontrata edhe për një vit tjetër, mosha e tij nuk e favorizon aspak.
Ndaj, drejtuesit e klubit katalanas kanë filluar që tani të mendojnë dhe të veprojnë për një sulmues të mirëfilltë që do të ishte zëvendësuesi ideal i polakut. Dëshira e madhe është suedezi Viktor Gyökeres, por transferimi i tij është i vështirë për shkak të konkurrencës së madhe dhe mbi të gjitha ka një çmim mbi 80 milionë euro, gjë që duket e vështirë të përballohet nga Barcelona, për shkak të problemeve të shumta financiare që ka pasur vitet e fundit.
E gjendur në këtë situatë, sipas asaj që raporton katalanasja SPORT, Barcelona po ndjek një emër të ri: Dushan Vlahovic, sulmuesi aktual i Juventus. 24-vjeçari thuhet se i është ofruar Barçës nga ndërmjetës të afërt me lojtarin dhe me marrëdhënie të mira me drejtuesit e Juventus-it.
“Zonja e Vjetër” pagoi 83 milionë euro për kartonin e tij te Fiorentina, kontrata e sulmuesit serb skadon në verën e vitit 2026, por është përfolur vazhdimisht për një largimin e mundshëm të tij nga Torino. Emri i tij është lidhur me disa klube të Premier League dhe tani së fundmi me Barcelonën.
Juventus nuk do hiqte dorë prej tij pa të paktën 50 milionë euro, një shifër disi e pranueshme për Barcelonën në kushtet në të cilat gjendet. Në verë pritet të nisin bisedimet serioze mes dy klubeve, ku nuk përjashtohet mundësia të përfshihen dhe lojtarë të tjerë në këtë operacion.
