Prokuroria e Posaçme ka shpallur pretencën për zyrtarët që janë marrë të pandehur për abuzimin me tenderin me vlerë 23 milionë euro për tunelin e Skërficës në rrugën Kardhiq-Delvinë, pikërisht për procedurën e prokurimit për ndërtimin e Loti 7.
Një prej të pandehurve është edhe ish-ministrja Sonila Qato, e cila kërkohet të shpallet fajtore për veprën penale “Shkelja e barazisë së pjesëmarrësve në tendera apo ankande publike” në kohën kur mbante postin e drejtoreshës së Autoritetit Rrugor Shqiptar.
Prokurori i SPAK, Elvin Gokaj ka kërkuar dënimin e Sonila Qatos me 1 vit burgim, si dhe dënim plotësues për heqjen e të drejtës për të ushtruar funksione publike për një periudhë prej 5 vitesh.
1 vit burgim kërkohet edhe për ish-zëvëndësen e Qatos, Elona Gogo, për veprën penale “Shkelja e barazisë së pjesëmarrësve në tendera apo ankande publike”, teksa ka qenë kryetarja e Komisionit të Vlerësimit të Ofertave.
Ndërtimi i Lotit 7 i aksit rrugor “Kardhiq-Delvinë”, i tenderuar në vitin 2019, u konsiderua ndër më sfiduesit në të gjithë këtë investim publik. Në këtë pjesë përfshihej vepra më e rëndësishme, ndërtimi i tunelit të Skarficës, me gjatësi rreth 1.3 kilometra. Por, tenderi zbuloi se problemi më i madh nuk ishte tuneli, por procedurat e prokurimit me vlerë rreth 23 milionë euro.
Fillimisht ishte Kontrolli i Lartë i Shtetit që zbuloi shkeljet dhe referoi materialet në Prokurori, teksa hetimet filluan pasi një nga kompanitë, më konkretisht kompania “Gjoka Constration” që garoi për të fituar tenderin e ndërtimit të rrugës Kardhiq-Delvinë, pretendonte se u skualifikua padrejtësisht nga gara.
Hetimet e SPAK provuan se Sonila Qato, Elona Gogo e zyrtarë të tjerë të ARRSH-së kishin favorizuar dukshëm bashkimin e operatorëve “Ircop” S.p.a. & “Sulova Ndërtim Prodhim” &”Vega” & “A&E Engineering”.
Pas hetimeve të kryera ka rezultuar se, ARRSH në kohën që drejtohej nga Sonila Qato ka skualifikuar nga gara 6 kompani mes të cilave edhe atë të “Gjoka Construcsion” edhe pse i plotësonte të gjitha kriterët. Nga auditimi ka rezultuar se nga gara është skualifikuar kompania me ofertën më të ulët duke i shkaktuar një dëm buxhetit të shtetit prej 5 milionë euro.
Veprimet e mëtejshme proceduriale provuan se, jo vetëm titullarët e ARRSH-së kishin kryer veprime të kundërligjshme, por edhe kompanitë fituese ishin përfshirë në një skemë falsifikimi dokumentash dhe krijimin e situatave fiktive, me qëllim fitimin e tenderit 23 milionë euro.
Në qendër të kësaj skeme falsifikimi është kompania “Vëllezërit Hysa”. Nga hetimet u provua se shoqëria “Sulova Ndërtim” nuk ishte gjë tjetër veçse një krijesë e shoqërisë “Vëllezërit Hysa” e cila përdorej nga kjo e fundit për qëllime të pjesëmarrjes në procedura prokurimi jo në emrin e saj por në emër të shoqërisë ‘Sulova Ndërtim Prodhim’”
Shoqëria “Vëllezërit Hysa” me seli në Elbasan nuk rezultonte formalisht pjesëmarrëse në tender, por hetimet krijuan dyshime të forta se shoqëria që kontrollohet nga Agron Hysa kishte lëvizur të gjithë fijet në prapaskenë. Shoqëria “Sulova Ndërtim-Prodhim” është regjistruar në vitin 2014 në Qendrën Kombëtare të Biznesit. Ajo është pronësi formale të Elton Musta, ndërkohë që ky i fundit ishte i punësuar tek “Vëllezërit Hysa”.
Pretenca për zyrtarët e tjerë
Për Simon Prendin kërkohet shpallja fajtor për veprat penale “Falsifikimi i dokumenteve” dhe “Shkelja e barazisë së pjesëmarrësve në tendera apo ankande publike” dhe dënimin e tij me 2 vite burgim si dhe dënimin plotësues për heqjen e të drejtës për të ushtruar funksione publike për 3 vite.
Për të pandehurin tjetër Erdit Salillari, kërkohet shpallja fajtor për kryerjen e veprës penale të “Shkelja e barazisë së pjesëmarrësve në tendera apo ankande publike” dhe dënimin e tij me 9 muaj burgim, si dhe dënim plotësues heqjen e të drejtës për të ushtruar funksione publike për një periudhë prej 5 vitesh.
Ndërsa për Admir Pahumin kërkohet shpallja fajtor për kryerjen e veprës penale të “Shkelja e barazisë së pjesëmarrësve në tendera apo ankande publike” dhe dënimin e tij me 1 vit burgim, si dhe dënim plotësues heqjen e të drejtës për të ushtruar funksione publike për një periudhë prej 3 vitesh.
Për Nikollaq Mihall kërkohet shpallja fajtor për kryerjen e veprës penale të “Shkelja e barazisë së pjesëmarrësve në tendera apo ankande publike” dhe dënimin e tij me 8 muaj burgim, si dhe dënim plotësues heqjen e të drejtës për të ushtruar funksione publike për një periudhë prej 3 vitesh.
Për Miranda Shkurtin kërohet shpallja fajtor për kryerjen e veprës penale të “Shkelja e barazisë së pjesëmarrësve në tendera apo ankande publike” dhe dënimin e tij me 8 muaj burgim, si dhe dënim plotësues heqjen e të drejtës për të ushtruar funksione publike për një periudhë prej 3 vitesh. Por për të, prokurori Elvin Gjokaj ka kërkuar që dënimi me burg t’i konvertohet në shërbim prove në një afat prej 16 muajsh.
Për Arbër Troka kërohet shpallja fajtor për kryerjen e për kryerjen e veprës penale të “Falsifikimi i dokumentave”, kryer nga personi që ka për detyrë ti lëshojë dhe në bashkëpunim dhe dënimin e tij me 2 vite burgim si dhe dënimin plotësues për heqjen e të drejtës për të ushtruar funksione publike për 3 vite.
Për Almir Hoxhaj kërohet shpallja fajtor për kryerjen e për kryerjen e veprës penale të “Falsifikimi i dokumentave”, kryer nga personi që ka për detyrë ti lëshojë dhe në bashkëpunim dhe dënimin e tij me 2 vite burgim si dhe dënimin plotësues për heqjen e të drejtës për të ushtruar funksione publike për 3 vite.
Për Arjana Hasanin kërohet shpallja fajtor për kryerjen e për kryerjen e veprës penale të “Falsifikimi i dokumentave”, kryer nga personi që ka për detyrë ti lëshojë dhe në bashkëpunim dhe dënimin e tij me 2 vite burgim si dhe dënimin plotësues për heqjen e të drejtës për të ushtruar funksione publike për 5 vite. Por për të, prokurori Elvin Gjokaj ka kërkuar që dënimi me burg t’i konvertohet në shërbim prove në një afat prej 4 vitesh.
Mbrojtja do të zhvillohet më 5 shkurt, në orën 14:00, ku më pas gjykata do të shpallë vendimin mbi kërkesën e Prokurorisë së Posaçme.
Detaje hetimi/ “Vëllezërit Hysa” sajuan kompani fiktive për tenderin Kardhiq-Delvinë
Tender fiktiv/ Agroni i “Vëllezërit Hysa” gjeti nënkotraktorët për Tunelin e Skarficës
