Pesë persona janë arrestuar në Shqipëri, një është shpallur në kërkim, si dhe një është kapur në Spanjë, në kuadër të operacionit ndërkombëtar të koduar “ICARO.AL” të hetuar nga autoritetet italiane.
Në kuadër të këtij operacioni deri më tani janë arrestuar 12 persona në total dhe 8 të tjerë janë nën hetim, ku u godit një grup kriminal italo-shqiptaro që trafikonin lëndë narkotike kokainë me automjete nga Amerika e Jugut për ta shitur në Itali dhe në shtete të Europës Qendrore.
Policia e Shtetit në bashkëpunim me SPAK kanë arrestuar në vendin tonë 5 anëtarë të grupit kriminal, më konkretisht shtetasit:
Igli Dervishi, 30 vjeç, banues në Elbasan;
Shkëlqim Pashja, 44 vjeç, banues në Elbasan;
Ervin Dema, 40 vjeç, banues në Elbasan;
Edmond Zhuja, 41 vjeç, banues në Shkodër;
Genti Berisha, 28 vjeç, banues në Tiranë.
Ndërkohë, në kuadër të këtij operacioni ndërkombëtar, raportohet se pas informacioneve të dhëna nga policia shqiptare, është arrestuar në Spanjë edhe shtetasi Gerardo Pashja alias Astrit Pashja, 48 vjeç, person me precedent penal.
Gjithashtu, gjatë zhvillimit të këtij operacioni, në Shqipëri, është shpallur në kërkim dhe shtetasi M. M., 28 vjeç, i cili kërkohet dhe për vepra të tjera penale. Autoritetet raportojnë se po punohet për kapjen e tij.
7 shtetasit e mësipërm në bashkëpunim dhe me persona të tjerë akuzohen nga Gjykata e Breshias në Itali, se të organizuar si grup, kanë trafikuar lëndë narkotike kokainë nga Amerika e Jugut, nëpërmjet automjeteve të modifikuara për fshehjen e lëndës narkotike dhe e kanë shitur atë në qytete të Italisë dhe në shtete të Europës Qendrore.
.
Interpol Tirana po bashkëpunon me homologët, për të finalizuar ekstradimet e personave të arrestuar në vendin tonë. Materialet procedurale i kaluan SPAK, për veprime të mëtejshme.
Hetimet nisën në gjysmën e dytë të vitit 2020, informojnë mediat italiane pas identifikimit të aktivitetit të shpërndarjes së kokainës në ambiente argëtuese në liqenin Garda, Itali.
Në vitin 2021, një nga të dyshuarit u kap me 350 kg kokainë, çka çoi në rikonstruktimin e një rrjeti kriminal italo-shqiptar.
Droga importohej nga Amerika e Jugut nëpërmjet automjeteve të modifikuara dhe shpërndahej në Itali dhe Europë.
Në krye të grupit kriminal ishin dy vëllezër nga klani Çela i Elbasanit. Ata drejtonin operacionet e trafikut, përfshirë importimin, shpërndarjen e drogës dhe grumbullimin e të ardhurave, të cilat dërgoheshin në Shqipëri përmes linjës së autobusëve Breshia-Elbasan.
Për të siguruar furnizime të drogës, vëllezërit udhëtuan në Kolumbi, Ekuador dhe Dubai, duke krijuar kontakte me furnizuesit kryesorë të kokainës.
Operacioni u koordinua nga Drejtoria Qendrore Kundër Krimit në Itali, në bashkëpunim me Shërbimin e Bashkëpunimit Ndërkombëtar Policor, Interpolin dhe agjencitë e sigurisë në Shqipëri dhe Spanjë. Përfshirja e Zyrës së Ekspertëve të Sigurisë në Tiranë dhe Madrid luajti një rol kyç në fazat përfundimtare të operacionit.
Ky megaoperacion përfaqëson një goditje të rëndësishme ndaj trafikut ndërkombëtar të drogës dhe bashkëpunimit kriminal ndërmjet grupeve shqiptare dhe atyre ndërkombëtare. Përpjekjet e koordinuara të autoriteteve pritet të vazhdojnë për të ndjekur penalisht të gjithë anëtarët e rrjetit.
