Kolegji i Posaçëm i Apelimit (KPA) do të zhvillojë ditën e sotme në orën 10:00 seancën gjyqësore publike për çështjen që i përket prokurorit Valentin Preçi.
Kjo është seanca e parë e transmetuar drejtpërdrejt nga KPA, pas kalimit të kompetencave të “Komisionerit Publik” tek drejtuesi i Prokurorisë së Posaçme, post i cili aktualisht mbahet nga Altin Dumani.
Prokurori Valentin Preçi është konfirmuar në detyrë nga shkalla e parë e vettingut, (KPK), por Komisioneri Publik Florian Ballhysa i kërkoi Kolegjit të Posaçëm të Apelimit që të ndryshojë vendimin e KPK-së dhe të vendosë për shkarkimin e Preçit, që sipas ankimit është gjetur me probleme në të tre kriteret e rivlerësimit.
Sa i përket kriterit të vlerësimit të pasurisë, Preçi ndodhet në mungesë të burimeve financiare të ligjshme dhe se ka kryer deklarim të pasaktë dhe të pamjaftueshëm të pasurisë. Komisioneri thotë se kjo vlen për dy pasuritë apartament banimi 84,5 m2 dhe garazh, por edhe për shpenzimet e udhëtimit dhe qëndrimit në SHBA të bashkëshortes apo edhe mbi pretendimet për mbulimin e disa shpenzimeve nga babai i bashkëshortes.
Edhe sa i përket kriterit të profesionalizmit, duke marrë parasysh denoncimet dhe rekomandimin e ONM-së Komisioneri vë në dukje se “veprimet e subjektit të rivlerësimit afektojnë kriterin e aftësisë profesionale”. Komisioneri Publik i gjen problematike kontaktet e prokurorit me disa persona të dënuar apo hetuar për vepra penale të ndryshme. Komisioneri arsyeton se subjekti duhej të ishte cilësuar i papërshtatshëm.
Kujtojmë se me mbarimin e mandatit më 31 dhjetor 2024, Komisioneri Publik do të zëvendësohet në seancat gjyqësore publike në Kolegj, nga drejtuesi i Prokurorisë së Posaçme
Mbarimi në fund të këtij viti i mandatit të komisionerëve publikë Florian Ballhysa dhe Irena Nino, pasohet edhe me marrjen e stafetës nga kreu i Prokurorisë së Posaçme, i cili do të përfaqësojë çështjet e apeluara në KPA.
Mandati i vazhdimit të Vettingut në shkallën e dytë ka si afat qershorin 2026. Aktualisht kanë mbetur për t’u shqyrtuar në KPA, mbasi janë apeluar, 42 gjyqtarë dhe prokurorë. Kurse në Gjykatën e Strasburgut rezulton se kanë bërë padi 130 gjyqtarë dhe prokurorë të shkarkuar në Shqipëri.
