Gazetari Robert Papa, tha në MCN TV se pretendimet se ka patur ftesa për politikanë shqiptarë në përurimin e Trump janë “përralla kineze”, duke shtuar se bëhet fjalë vetëm për bileta të dhuruara nga kongresmenë dhe senatorë.
Ai theksoi se ftesa përmes telefonatave ka patur vetëm për disa liderë të djathtë si Meloni, Milei dhe Orban. Papa thekson se nuk ka patur një ftesë për Ramën, sepse kemi të bëjmë me një politikan të majtë dhe periferik. Gazetari shton se Rubio e ka bërë të qartë se investimet e familjarëve të Trump, përfshirë Kushnerin, nuk do të ndikojnë në vendimet e DASH-it për vende të caktuara.
“Këtë radhë do bëhet inaugurimi brenda Kapitolit, te Rotunda, ka tre arsye, mosha e madhe, temperaturat shumë të ulëta, apo rreziku për ndonjë atentat. Ftesat për shqiptarët janë përralla kineze, sepse inaugurimi presidencial është problem i brendshëm, por kongresmenë dhe senatorë kanë tickets që mund t’ua dhurojnë mbështetësve të tyre, shpesh edhe me pagesa. Nuk ka ftesa. Mua më vjen keq që edhe Presidentja e Kosovës thotë që kisha ftesë, jo, s’janë ftesa, përfaqësuesi diplomatik merr pjesë si kortezi. Trump ka bërë ftesa për persona të krahut të djathtë, Meloni, presidenti i Argjentinës, ish-Presidenti i Brazilit, ekstremi i djathtë anglez, ish-kryeministri i Polonisë, Orban, dhe ftesat janë me telefonata, përmes njerëzve të tij të afërt. Nuk ka ftesa, shpresonte shumë Vuçiç dhe Rama. Ka shumë gjasa që Kushner s’ua ka hapur telefonin. Ka edhe politikanë shqiptarë që mund të kenë akses përmes kongresmenëve dhe senatorëve për të qenë në rreshtin e parë dhe të dytë.
Ardhja e Trump pritet të ndryshojë shumë në SHBA. Do vuloset kufiri jugor ku kanë hyrë 14 milionë të paligjshëm, do të luftohet inflacioni, do ulet çmimi i naftës, dhe do ketë një grusht shkatërrimtar ndaj woke-izmit, që ishte plaga që administrata e Biden solli humbjen e Harrisit. Do ketë që të martën 100 urdhra ekzekutiv. Trump këtë radhë është i përgatitur. Këtë radhë ai kërkon besnikë, si në mesjetë ndaj feudalëve, për të zbatuar programin e MAGA-s. Emërimet e tij janë bombastike dhe mund të ketë kundërshtime por Senati është vënë në rresht. I është bërë një pyetje konkrete Sekretarit të ardhshëm Rubio për investimet private të familjarëve të Trump-it. Tha që s’do ndikojnë politikat e jashtme të DASH ndaj atyre vendeve që do bëjnë investime familjarët e Trump-it dhe Kushner. Kushner është një sekser, paratë janë të arabëve, dhe Kushner disa herë ka dështuar me paratë e arabëve. Ka një klauzolë që qeveria mund ta revokojë kontratën. Synimi ishte për një ftesë, por s’veprohet kështu në SHBA”.
I pyetur përse s’është dërguar një ftesë për Ramën, Papa tha:
“E para s’e meriton, e dyta është një fshat shumë periferik, s’kanë marrë asnjëherë pjesë në inaugurimet e presidentëve. Në qoftë se e ka pretenduar këtë, tregon që s’e njeh aspak politikën amerikane. Nuk është Rama në nivelin e Orbanit, Melonit, në fund të fundit s’është i djathtë. Trump do mbështesë të djathtën”.
