I shumëkërkuari Gjovalin Lesi është ekstraduar nga Italia drejt Shqipërisë.
Shtetasi Gjovalin Lesi është dënuar me burgim të përjetshëm nga Gjykata e Rrethit Gjyqësor Mirditë, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”.
56 vjeçari akuzohet për një vrasje të dyfishtë në Rubik. Gjovalin Lesi në vitin 1997 pas një konflikti për motive të dobëta ka vrarë me kallashnikov motrën dhe bashkëshortin e saj.
“Ekstradohet nga Italia, i dënuari me burgim të përjetshëm, për vrasje të dyfishtë. Si rezultat i koordinimit të punës ndërmjet specialistëve të Interpol Tiranës dhe homologëve të tyre në Romë, u finalizua procedura për ekstradimin në Shqipëri, të shtetasit Gjovalin Lesi, 56 vjeç, i lindur në Lezhë.
Në vitin 1998, Gjykata e Mirditës e ka dënuar këtë shtetas, me burgim të përjetshëm, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit”.
Në vitin 1997, shtetasi Gjovalin Lesi, pas një konflikti për motive të dobëta, në fshatin Rrasfik, Rubik, vrau me armë zjarri kallashnikov, motrën dhe bashkëshortin e saj”, njofton policia.
- Pamje nga ekstradimi i Gjovalin Lesit
- U arrestua më 3 prill 2024 në Itali, kush është Gjovalin Lesi
Gjovalin Lesi ishte në listën e personave më të kërkuar pasi edhe pak vite më parë njësia e kërkimit nxori emrin dhe foton e tij si ndër personat e shumëkërkuar.
Sipas autoriteteve policore italiane, Gjovalin Lesi është arratisur drejt shtetit fqinj që prej vitit 2003 dhe për t’i shpëtuar arrestimit përdorte identitetin e vëllait të tij të sëmurë.
Më 3 prill të 2024, Policia italiane e ka gjetur 56-vjeçarin në shtëpinë e tij dhe siç duket nga pamjet, pasi e kanë vënë në pranga kanë kryer një kontroll të detajuar. Më pas, ai është transportuar drejt burgut të Matera-s.
56-vjeçari i shpëtoi burgut për vite me radhë më Itali. Si rezultat i shkëmbimit të menjëhershëm të informacioneve të siguruara nga Departamenti i Policisë Kriminale në DPPSH, me Policinë e Materas, shkëmbim i kryer me koordinimin e Zyrës së Interforcës Italiane, Zyrës së Ekspertëve Italianë të Sigurisë, në Shqipëri, dhe Shërbimit për Bashkëpunim Ndërkombëtar Policor – Divizioni i 2-të, Romë, u finalizua operacioni policor i koduar “Verdikti”.
Gjatë këtij operacioni, u lokalizua dhe u arrestua më 3 prill me qëllim ekstradimin në Shqipëri, shtetasi i shumëkërkuar ndërkombëtarisht Gjovalin Lesi, i lindur në Rubik.
- Momentet e arrestimit të Gjovalin Lesit në Itali
