Policia e Tiranës, përmes një deklarate për mediat, ka dhënë detajet lidhur me zbardhjen e vrasjes së 81-vjeçarit Xhemal Meta në Zall-Bastar, i cili u gjet pa shenja jete në oborrin e banesë së tij dy ditë më parë.
Fillimisht ngjarja u raportua si aksidentale, por më pas, ekspertiza mjeko-ligjore zbuloi se në kokën e viktimës kishte shenja të dukshme dhune, të shkaktuara nga sende të forta.
Si autor i dyshuar i krimit është arrestuar fqinji i viktimës, 64-vjeçari Isuf Hasa, i cili sipas bluve të kryeqytetit i kishte shkuar në banesë pas një konflikti që kishin patur mes tyre për motive të dobëta.
Gjatë përplasjes mes tyre, Isuf Hasa e ka qëlluar me çekiç mbrapa koke Xhemal Metën, duke e lënë të vdekur në vend. Pas krimit, Hasa i ka marrë 81-vjeçari lekët në xhep dhe është larguar nga vendi i ngjarjes.
Policia ka gjetur në banesën e vajzës së autorit një çekiç, i cili dyshohet se është përdorur në krim. Gjithashtu, gjatë kontrollit është gjetur dhe një shumë prej 2 milionë lekësh të vjetra, e cila dyshohet se i është grabitur të moshuarit.
“Nga tërësia e veprimeve hetimore ka rezultuar se më datë 13.01.2025, rreth ores 09:00, shtetasi Isuf Hasa, 64 vjec, ka shkuar në banesën e fqinjit të tij Xhemal Meta dhe për motive të dobëta e ka qëlluar atë me një mjet të fortë (çekiç) në pjesën e pasme të kokës duke i shkaktuar vdekjen.
Nga veprimet hetimore dyshohet se autori i dyshuar Isuf Hasa, pasi e ka goditur viktimen i ka marrë dhe një sasi vlerash monetare që ai mbante në xhep, dhe më pas është larguar.
Nga kontrollet e shumta të kryera në disa banesa të autorit dhe familjarëve të tij, janë gjetur dhe sekuestruar një sasi prej 200.000 lekë të rinj. Po nga kontrollet e ushtruara në banesën e shtetases L.H,(vajza e autorit të dyshuar) në fshatin Gjokaj, Vorë, Shërbimet e Policisë gjetën dhe sekuestruan në cilësinë e provës materiale sendin e dyshuar (çekiç) më të cilin autori ka kryer vrasjen .” – deklaroi drejtori i Policisë së Tiranës, Elton Alushi.
Mbi 64-vjeçarin Isuf Hasa është ngritur akuza për kryerjen e veprës penale “Vrasja me paramendim ”.
Prej vitesh viktima Xhemal Meta jetonte i vetëm në Shëngjin të Vogël, pjesë e njësisë administrative Zall-Bastar, ndërsa familjarët e tij jetojnë në Tiranë, përfshirë edhe bashkëshorten.
Xhemal Meta kishte disa bagëti të imta dhe pula, me të cilat merrej në përditshmëri, teksa sipas deklarimeve të familjarëve, ai mbante gjithmonë lekë me vete.
Në momentin kur u gjet pa shenja jete, 81-vjeçarit nuk i është gjetur portofoli dhe disa sende të tjera që mbante me vete, por megjithatë shtëpia është gjetur e paprekur.
Nisur nga ky fakt, direkt u ngritën dyshime se mund të kishim të bënim me një grabitje të viktimës, ashtu dhe siç rezultoi pas zbardhjes së ngjarjes.
