Është mbajtur ditën e sotme seanca e radhës në Gjykatën e Durrësit ndaj Hysen, Hygerta dhe Amrildo Metas, tre shtetasit që akuzohen për vrasjen dhe fshehjen e trupit të babait të tyre, Pëllumb Meta, ngjarje kjo e ndodhur më 13 shkurt të vitit të kaluar në Shënavlash të Durrësit
I pranishlm në seancën e sotme ka qenë vetëm fëmija i vogël, Amarildo Meta, teksa gjyqtarja Suela Xhani ka vendosur të mbajë seancën me dyer të mbyllura.
Për shkak të mungesës në gjyq të Hysen dhe Hygerta Metës, dy fëmijëve të tjerë të viktimës, të tre të arrestuar për krimin, gjykata ka shtyrë procesin duke kërkuar praninë e tyre fizike, të detyruar në seancë, për të dhënë deklarimet e para.
Prokuroria e Durrësit përfundoi në muajin dhjetor hetimet paraprake për këtë ngjarje dhe çoi për gjykim pesë persona të akuzuar për përfshirjen e tyre në këtë krim të rëndë, mes të cilëve janë tre fëmijët e viktimës, nëna e tyre, dhe një person tjetër që ka ndihmuar në fshehjen e provave.
Ndaj dy fëmijëve të mëdhenj të viktimës, Hysen dhe Hygerta Metës rëndojnë akuzat për veprat penale “Vrasja për shkak të marrëdhënieve familjare”, “Mbajtja pa leje dhe prodhimi i armëve, armëve shpërthyese dhe i municionit”, “Fshehja ose asgjësimi i kufomës” e kryer në bashkëpunim.
Ndërkohë ndaj djalit të vogël, Amarildo Meta rëndon akuza për veprën penale “Fshehja ose asgjësimi i kufomës”, e kryer në bashkëpunim.
Blerina Meta, bashkëshortja e viktimës, akuzohet për “Veprime që pengojnë zbulimin e të vërtetës”, në bazë të nenit 301 të Kodit Penal.
Në këtë çështje është përfshirë edhe Sajmon Bajramaj, pronari i automjetit të përdorur nga të pandehurit për fshehjen e provave. Ai akuzohet për “Mos kallëzim krimi”, pasi dyshohet se ka ndihmuar në largimin e makinës së viktimës në zonën e Sektor Rinia.
Sipas prokurorisë, motivet e krimit lidhen me konflikte të thella brenda familjes. Pas vrasjes, të pandehurit dyshohet se kanë bashkëpunuar për fshehjen e trupit dhe provave.
Hygerta Meta ka marrë përsipër krimin se ka qenë ajo që ka qëlluar me pistoletë ndaj babait të saj, por, ajop ka ndryshuar disa herë qëndrim, duke shtuar dyshimet tek grupi hetimor. Kjo edhe për faktin se në armën e krimit janë gjetur edhe gjurmët e gishtërinjëve të Hysen Metës.
Në eksperimentin hetimor, Hygerta Meta kreu disa qitje radhazi, duke vërtetuar se ajo dinte ta përdorte armën. Por, dy djemtë e arrestuar dhe bashkëshortja e viktimës, Blerina Meta, refuzuan të qëllojnë duke u thënë hetuesve se nuk dinë të përdorin armë dhe se nuk kanë provuar të bëjnë qitje ndonjëherë.
Refuzimi i ka thelluar dyshimet tek grupi hetimor se vrasjen e 50-vjeçarit mund ta ketë kryer njëri nga djemtë dhe se autorësia po kërkohet t’i lihet vajzës, me shpresën se ajo mund të dënohet më pak.
Ngjarja ka tronditur opinionin publik për shkak të natyrës së saj tragjike dhe përfshirjes së gjithë familjes në këtë akt kriminal.
