Ergin Isa është drejtuar në redaksinë e emisionit “Stop”, pasi ka një rrobaqepësi të vogël në qytetin e Durrësit dhe herë pas here lidhet me firma të mëdha, për të marrë punë. Në muajin Prill firmosi një kontratë me firmën “Do-Al sh.p.k” në Tiranë.
Sipas marrëveshjes, Ergini do të qepte nëpërmjet rrobaqepësisë sasi të ndryshme rrobash dhe do të merrte një pagesë të caktuar. Bëri disa punë, si qepje xhupash dhe bluzash dhe iu tha, se në fund do të merrte pagesën, por kjo nuk ndodhi.
Nga muaji Prill në Dhjetor nuk ka marrë asnjë pagesë. Pagesa, që duhet të merrte është 2 milionë e gjysmë lekë të vjetra. Si pasojë, Ergini nuk ka paguar as punonjëset e rrobaqepësisë së tij dhe ato tashmë janë larguar.
Ergin Isa: Në muajin Prill kam marrë punë nga një firmë e madhe këtu në Tiranë, “Do-Al Textil Shpk” me pronaren të quajtur Droisa Alikaj. Unë kisha kontratë që përfshinte që për çdo lloj qepje që bënim ne për mbanim përgjegjësi për datën, për dorëzimin.
Gazetarja: Dhe ju nga muaji Prill, e deri tani sa punë keni bërë dhe çfarë keni qepur ekzaktësisht dhe në cilën sasi?
Ergin Isa: Ne kemi bërë tre punë dhe kemi marrë një pasi 230 copë në fillim, kemi qepur xhupa. Pasi dorëzuam këtë morëm dhe një sasi tjetër me 190 copë, po përsëri dhe ato xhupa. Morëm dhe një sasi tjetër disa bluza dhe na u konfirmua që pasi të bëhet kjo punë pasi ishte dhe kjo shpejt e shpejt të bëhej pagesa.
Gazetarja: Sa do të ishte pagesa që do të kryej nga jush?
Ergin Isa: Pagesa duhet të ishte rreth 2 milonë e gjysëm lek të vjetra.
Gazetarja: Çfarë ndodhi?
Ergin Isa: Duke na mashtruar, jo sot po nesër. Lija punë këtu, shkoja aty, por nuk më jepte asnjë përgjigje. Ik më thoshte se sa të arrish ti në Durrës do të konfirmoj pagesën. Vija këtu prisja të më vinte një mesazh nga ana e bankës për pagesën, por asnjë.
Gazetarja: Më trego pas se si është gjendja e rrobaqepësisë tuaj sot?
Ergin Isa: Kisha deri në 7 punonjëse dhe sot nuk kam asnjë.
Gazetarja: Ti rrobaqepëset që kishe nuk i ke paguar apo jo?
Ergin Isa: Normalisht që jo, sepse po të ishin paguar ato do të ishin sot këtu. Kërkoj vetëm të marr lekët e mia, asnjë gjë më tepër.
Denoncuesi tregon për “Stop” dhe mesazhet që ka shkëmbyer me ekonomisten e firmës.
Ekonomistja: Ta thashë edhe një herë. Fola me zonjën dhe më tha, do të ta nis unë mandatin. Pa më nisur ajo, nuk kam çfarë të dërgoj. Sapo të më dërgojë mandatin, unë ta dërgoj. Edhe unë punonjëse jam këtu, nuk jam unë pronarja, që të vendos. Nuk po të thotë kush, që nuk ke të drejtë. Thjesht po them, që nuk ke, pse mendon gjëra të tilla, që po të mashtrojmë, apo ku di unë çfarë mendon, se as s’i çoj nëpër mend, jo më t’i bëj.
“Stop” shkoi pranë fasonerisë “Do-Al Textil Shpk” dhe veprimi i parë, që administratorja bëri ishte fshehja në zyrë edhe pse nuk e dinte, se pse “Stop” kishte shkuar.
Më pas ajo nuk pranoi të sqarojë problematikën, por thirri policinë për të bërë denoncim për hyrje pa leje në godinën që ajo ka me qira, edhe pse “Stop” kishte leje nga pronarët./tvklan
