Presidenti i Partisë së Lirisë, Ilir Meta, ka reaguar në rrjete sociale përpara se të nisë seancën e marrjes në pyetje në SPAK. Meta mohon se ka hyrë në SPAK rreth orës 10 për tu marrë në pyetje dhe tregon se është ende në qeli.
Ai shton më tej se lajmin se do të merret në pyetje ditën e sotme nga prokurorët e SPAK e ka marrë nga mediat dhe jo sipas procedurave ligjore.
Meta shprehet se mezi po pret të takohet me ““kolegët” e megahajdutëve të regjimit më të korruptuar në kontinent”.
“Rreth 15 minuta më parë mediat e regjimit mashtruan duke pretenduar se unë kam hyrë në ambientet e SPAK.
Nuk është e vërtetë.
Unë akoma jam në qelinë Nr.5, i gatshëm që në ora 10:00 për të shkuar në SPAK edhe pse lajmërimin e kam marrë nga mediat e regjimit dhe jo sipas procedurave ligjore.
Mezi po pres të takohem me “kolegët” e megahajdutëve të regjimit më të korruptuar në kontinent dhe pas seancës reciproke të pyetjeve në SPAK, jam i hapur t’u përgjigjem pyetjeve të gazetarëve,” shkruan Meta.
