Një person është vënë në pranga në Pikën Kufitare të Kakavijës pasi dyshohet se ka fshehur makinën tip “Ford” nga e cila u qëllua me armë në drejtim të dy personave në 2 janar në Berat.
Policia bën të ditur se në pranga është vënë shtetasi me iniciale E. D., 46 vjeç, banues në Berat, për veprën penale “Përkrahja e autorit të krimit”
“Në vijim të veprimeve të thelluara hetimore dhe procedurale, të kryera në drejtimin e prokurorit, menjëherë pas kësaj ngjarjeje, specialistët për Hetimin e Krimeve të DVP Berat, në bashkëpunim me shërbimet e PKK Kakavije, vunë në pranga shtetasin E. D., 46 vjeç, banues në Berat, për veprën penale “Përkrahja e autorit të krimit”.
Nga hetimet e deritanishme dyshohet se ky shtetas ka fshehur automjetin tip “Ford” nga i cili dyshohet se kanë qëlluar me armë zjarri, vëllezërit F. M. dhe M. M., në drejtim të shtetasve A. M. dhe A. Dh., të cilët lëviznin me këmbë, në lagjen “Donika Kastrioti”. Nga të shtënat nuk pati shtetas të dëmtuar.
Vijojnë kërkimet për lokalizimin dhe kapjen e shtetasve të shpallur në kërkim F. M. dhe M. M., si dhe për dokumentimin e plotë të rrethanave të tjera të kësaj ngjarjeje.”– njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
Si ndodhi ngjarja
dy shënjestrat e atentatit ishin Antonio Merkaj dhe Apostol Dhëmbi (shokë mes tyre), të cilët ishin duke lëvizur me një motor. Ata kanë qenë tek “Karaburant Merko”, kur nga një automjet tip ‘Ford’ i zi është qëlluar në drejtim të tyre. Merkaj dhe Dhëmbi janë larguar me vrap nga karburanti në drejtim të spitalit, ndërkohë që makina i ka ndjekur nga prapa duke qëlluar me breshëri kallashnikovi në drejtim të tyre.
Ndërkohë që dy shënjestrat janë larguar në brendësi të lagjes “Donika Kastrioti”, atentatorët janë larguar me shpejtësi nga vendngjarja.
Autorët e atentatit janë dy vëllezërit Fatjon dhe Marko Maloku, banues në lagjen “Donika Kastrioti” në Berat.
Konflikti mes dy grupeve dyshohet se ka nisur në shtetin grek, për prishje pazaresh droge mes tyre.
