Një ngjarje e rëndë ndodhi gjatë natës në zonën e Shkozës, Tiranë, ku polici Anxhelo Kumaraku u plagos me armë zjarri.
Ai ndodhej së bashku me fqinjin e tij, Klejdi Spaja, i cili ishte në masë “arrest shtëpie” për veprën penale të armëmbajtjes pa leje.
Sipas hetimeve paraprake, Spajaj ishte shënjestra e atentatit.
Klejdi Spaja 31 vjeç, ishte vendosur në masën e sigurisë “arrest shtëpie” pas akuzave për armëmbajtje pa leje.
Grupi hetimor ka dyshime se autorët janë dy vëllezër që janë shpallur në kërkim.
Dyshimet e policisë kanë të bëjnë se një nga dy vëllezërit ka pasur një konflikt për çështje borxhi me fqinjin e efektivit të policisë.
Në atë ngjarje, Klejdi Spaja, e kishte dhunuar një nga dy vëllezërit, për shkak se nuk i kishte shlyer një shumë borxhi. Duket se ky konflikt ka vijuar edhe mbrëmjen e djeshme.
Ndërkohë efektivi i policisë që mbeti i plagosur në deklarimet e dhëna ka pohuar se ndodhej në derën e banesës së fqinjit të tij, për shkak se ky i fundit i kishte kërkuar që të shihnin një automjet dhe nuk mund të largoheshin larg banesës për shkak të masës.
