Është zbardhur identiteti i të moshuarit, i cili u gjet i masakruar me thikë dhe pa shenja jete mbrëmjen e së hënës në banesën e tij në Durrës.
Mësohet se viktima është shtetasi Paulin Gina, 82 vjeç, i cili jetonte i vetëm në lagjen 16 të qytetit bregdetar.
Burime bëjnë me dije se në trupin e të moshuarit është konstatuar prerje me thikë në fyt, si dhe dëmtime në fytyrë. Ky fakt konfirmohet edhe nga Policia e Durrësit përmes një komunikate të shkurtër për mediat.
“Rreth orës 18:50, në lagjen nr. 16, Durrës, është gjetur në banesën e tij pa shenja jete shtetasi P. G., 82 vjeç. Pas këqyrjes paraprake të trupit të 82-vjeçarit dhe nga hetimet paraprake dyshohet se 82-vjeçari është goditur me mjet prerës (thikë) dhe për pasojë ka humbur jetën”, – njoftoi policia.
Mësohet se Paulin Gina kishte humbur kontaktet me familjarët, pasi këta të fundit tentonin që të komunikonin me të në telefon, por i moshuari nuk iu përgjigjes. Më pas mësohet se familjarët kanë telefonuar një fqinj të tijin, i cili iu ka thënë se nuk e kishte parë.
Më pas, të alarmuar familjarët bënë kallëzimin në Polici, dhe pasi uniformat blu shkuan në vendin e ngjarjes, hapën derën me forcë dhe janë ndeshur me skenën e krimit të rëndë.
Trupi i 82-vjeçarit është transportuar për në morg për ekspertizë mjekoligjore, për të përcaktuar saktësisht shkaqet e dëmtimeve të konstatuara. Ende nuk dihet nëse kemi të bëjmë me një vrasje për motive grabitjeje apo për motive të tjera.
Grupi hetimor nën drejtimin e Prokurorisë po punon për sqarimin e rrethanave, identifikimin dhe arrestimin e autorit/ve.
Po ashtu, mësohet se do të pyeten edhe komshinjtë për të mësuar se kush ka kontaktuar i fundit me të moshuarin, si dhe janë sekuestruar edhe pamje filmike.
