Policia e Shkodrës ka ekzekutuar një operacion anti-droge, duke kapur në pikën kufitare të Muriqanit 3 kilogram e 430 gramë kokainë.
Si rezultat i operacionit policor të koduar “Pakot” është arrestuar një i ri, i cili po e transportonte me fugon. Më konkretisht, në pranga është vënë shtetasi Adriatik Rrasa, 32 vjeç, banues në Lushnjë.
Veç lëndës narkotike, Rrasa ka patur në fugon edhe 60 shishe me pije alkoolike dhe një televizor, që dyshohet se janë të kontrabanduara. Drogën 32-vjeçari e kishte fshehur në tavanin e fugonit.
“Nga kontrolli i kryer në furgonin që drejtonte 32-vjeçari, në hyrje të Shqipërisë, u gjetën 3.430 kg Kokainë, e ndarë në 3 pako. Gjithashtu, u gjetën 60 shishe me pije alkoolike dhe 1 televizor, që dyshohet se janë të kontrabanduara, pasi nuk ishin të pajisura me fatura blerjeje.” – thuhet në njoftimin e Policisë.
Kokaina, mallrat, automjeti i të arrestuarit dhe dy celularë të tij raportohet se janë sekuestruar nga Policia, në cilësinë e provës materiale.
Materialet procedurale i kaluan Prokurorisë së Shkodrës për veprime të mëtejshme.
