Policia e Durrësit ka zbardhur vrasjen e të moshuarit, Paulin Gina, 82 vjeç, i cili pasditen e djeshme u gjet i masakruar në banesën e tij.
Autoritetet policore të qytetit bregdetar raportojnë se autori i dyshuar i ngjarjes është fqinji i të moshuarit, shtetasit Fation Janina, 39 vjeç, banues në lagjen nr. 13. Ai është arratisur pas ngjarjes, teksa është është arrestuar disa orë më vonë nga uniformat blu.
Gjatë kontrollit të ushtruar në banesën e 39-vjeçarit, uniformat blu kanë gjetur dy thika, një çekiç dhe veshjet që dyshohet se ka patur autori gjatë kryerjes së krimit. Raportohet se thika, çekiçi dhe veshjet me njolla gjaku janë dërguar në Institutin e Policisë Shkencore, për ekzaminime të mëtejshme.
Burime bëjnë me dije se Fation Janina, pasi ka kryer krimin, ka mbyllur me çelës derën nga jashtë, ka fshehur mjetet me të cilat kreu vrasjen dhe më pas është larguar.
Mbi 39-vjeçarin Fation Janina rëndojnë akuzat për veprat penale “Vrasja me dashje” dhe “Mbajtja pa leje e armëve të ftohta”, teksa materialet janë referuar në Prokurori.
Paraprakisht dyshohet se krimi makabër ka ndodhur për motive të dobëta. 39-vjecari njihet si një njeri që konsumonte shpesh alkool dhe nuk përjashtohet pista që të ketë qenë i dehur në momentin e ngjarjes.
Mësohet se mbyllja e derës ka çuar policinë në dyshimet se autori ka qenë person që njihet me viktimën. Sapo kanë nisur hapjet e kamerave të sigurisë së një karburanti aty ngjitur, është konstatuar lëvizja e fundit e viktimës dhe hyrjet dhe daljet e vetme që kanë ndodhur në pallat gjatë kësaj fashe orare.
Nga hyrjet dhe daljet janë konstatuar vetëm lëvizjet e fqinjëve. Në kushte të tilla ka nisur marrja në pyetje e tyre dhe janë ushtruar kontrolle në banesa. Pasi kanë siguruar informacione nëpërmjet rrugëve operative dhe i kanë bashkëngjitur dhe hetimet që janë bërë, blutë e qytetit kanë konstatuar armët e krimit në banesën e Fation Janinës.
Kujtojmë se i moshuari kishte prerje me thikë në fyt, si dhe dëmtime të shumta në fytyrë, që siç duket autori e ka goditur dhe me thikë dhe me çekiç, teksa ende nuk dihet motivi i krimit.
Paulin Gina kishte humbur kontaktet me familjarët, pasi këta të fundit tentonin që të komunikonin me të në telefon, por i moshuari nuk iu përgjigjej. Më pas mësohet se familjarët kanë telefonuar një fqinj të tijin, i cili iu ka thënë se nuk e kishte parë.
Të alarmuar familjarët kanë bërë kallëzimin në Polici, dhe pasi uniformat blu shkuan në vendin e ngjarjes, hapën derën me forcë dhe janë ndeshur me skenën e krimit të rëndë.
Policia e Durrësit ka publikuar dhe pamjet e çekiçit dhe thikave, e po ashtu dhe një veshje me njolla gjaku të 32 vjeçarit, si më poshtë:
