Partia Socialiste ka reaguar rreth komenteve në media rreth qëndrimit të socialistëve në mbledhjen e sotme të KQZ-së për numërimin e votave të diasporës.
Përmes një njoftimi, PS bën të ditur se ka mbajtur qëndrimin që ja beson plotësisht procesin e numërimit të votave të diasporës, administratës së Komisionit Qëndror të Zgjedhjeve të drejtuar nga Ilirjan Celibashi.
Socialistët kërkojnë që partitë politike të mos kenë të drejtë të numërojnë votat e diasporës, por të kenë statusin e rolit të vëzhguesit nga afër për të gjithë procesin e numërimit të këtyre votave që mbërrijnë përmes shërbimit postar.
“Partia Socialiste ka mbajtur qëndrimin se ja beson plotësisht procesin e numërimit të votave të diasporës administratës së Komisionit Qëndror të Zgjedhjeve.
PS ka kërkuar që partitë politike të mos kenë të drejtë të numërojnë votat në KQZ, por të kenë statusin e rolit të vëzhguesit nga afër për të gjithë procesin e numërimit të këtyre votave që mbërrijnë përmes shërbimit postar.” – thuhet në reagimin e PS-së.
Ky është një qëndrim krejt i kundërt nga Partia Demokratike, e cila kërkon që procesi të jetë i njëjtë si për votat brenda vendit, po ashtu edhe ato jashtë vendit dhe se KQZ e Celibashit nuk mund të shpikë një proces të ri.
“Në asnjë gërmë nuk i jepet leje kreative KQZ-së që të shpikë një proces të ri, teksa Kodi Zgjedhor ka rregulla për të gjithë procesin. Nuk jeni të autorizuar të shpikni procedurë krejt të re, ndryshe nga ajo e shqiptarëve që votojnë brenda vendit. Të jetë e njëjtë si brenda vendit.” – tha sot Ivi Kaso, sekretari për çështjet ligjore në PD.
Kujtojmë se Ilirjan Celibashi është konsideruar nga opozita si një “kukull” në duart e Edi Ramës dhe këtë e treguan si zgjedhjet në Himarë, po ashtu edhe data e zgjedhjeve parlamentare të 11 Majit, ku të dy palët propozuan të njëjtën datë.
