Paris-Saint Germain duket se është gati të ofrojë më shumë se 100 milionë euro për të nënshkruar objektivin e Barcelona-s, Alexander Isak.
Talenti i 25-vjeçarit suedez ka vazhduar të shkëlqejë në sezonet e fundit pas kalimit të tij nga Real Sociedad te Newcastle. Këtë sezon, sulmuesi i Magpies ka shënuar 12 gola dhe ka dhënë katër asiste në 19 ndeshje në Premier League dhe Carabao Cup.
Paraqitjet e tij kanë zgjuar interesimin e klubeve si Barcelona, që e kanë identifikuar atë si një nga objektivat e tyre kryesore në të ardhmen e afërt. Me sulmuesin aktual Robert Lewandowski tani 36 vjeç, ka ardhur koha për të kërkuar një zëvendësues afatgjatë.
Blerja e Isak nuk do të jetë një detyrë e lehtë, pasi Newcastle, i cili nënshkroi atë për mbi 70 milionë euro nga Sociedad në 2022, do të kërkojë të fitojë nga shitja e tij.
Kjo duket se nuk e ka zbehur interesin e katalanasve, pasi ata besojnë se Isak do t’i përshtatej jashtëzakonisht stilit të tyre të lojës. Megjithatë, shpresat e tyre për një transferim të tillë mund të prishen nga PSG, sipas El Nacional.
Parisienët kanë mbetur shumë të impresionuar me Isak, dhe sipas raportit, trajneri Luis Enrique është i “fiksuar” me sulmuesin.
Kjo ka bërë që klubi francez të fillojë përgatitjet për të paraqitur një ofertë gjigante prej mbi 100 milionë euro për të bindur Newcastle.
