Nga Boldnews.al
Drejtori i Përgjithshëm i Shërbimit të Transportit Rrugor, Ilir Mëngra, mohon që të ketë përplasje projektesh me Fondin Shqiptar të Zhvillimit për ndërtimin e pjesëve të ndryshme të “Auto-Moto Parkut” në Elbasan, megjithëse dokumentat zyrtare tregojnë të kundërtën e pretendimeve të tij.
Në fund të Tetorit 2024, Fondi Shqiptar i Zhvillimit (FSHZH) njoftoi anulimin e procedurës tenderuese me fond limit 137.5 milionë lekë të reja (rreth 1.3 milionë euro), me objekt “Ngritja e infrastrukturës mbështetëse në funksion të kompleksit multi-funksional për zhvillimin e sektorëve të ndryshëm të motorizimit, Auto-Moto Park, në Bashkinë Elbasan Faza II. Ndërtimi i Tombinove”.
Sipas njoftimit të publikuar në Buletinin e Agjencisë Publike të datës 4 nëntor 2024, institucioni i drejtuar nga Dritan Agolli argumenton anulimin: “…Nga informacioni i marrë këto ditë nga përfaqësuesit e Bashkisë Elbasan dhe përfaqësuesit e DPSHTRR, rezulton se, për Auto-Moto Parkun po zhvillon procedurë prokurimi edhe Drejtoria e Shërbimit të Transportit Rrugor e cila është në fazën përfundimtare të projektit të zbatimit dhe sipas tyre, janë bërë disa ndryshime në lidhje me planin e përgjithshëm të sistemimit dhe të funksionimit të tij”.
Duket qartë se Drejtoria e Shërbimit të Transportit Rrugor dhe Fondi Shqiptar i Zhvillimit kanë, më së paku, mungesë qartësie dhe koordinimi mes tyre për realizimin e projektit që përllogaritet në disa miliarda lekë të vjetra (miliona euro).
Por, kreu i Drejtorisë së Shërbimit të Transportit Rrugor, Ilir Mëngra, në një përgjigje zyrtare për “Boldnews.al”, mohon që të ketë përplasje mes institucioneve.
“Lidhur me pyetjen tuaj, procedura me objekt ‘Ngritja e infrastrukturës mbështetëse në funksion të kompleksit multi-funksional për zhvillimin e sektorëve të ndryshëm të motorizimit…’ është publikuar dhe anuluar nga Fondi Shqiptar i Zhvillimit.DPSHTRR, aktualisht, ka një kontratë me projektuesit e ‘Auto Moto Park’, e cila rezulton se është drejt fazën përfundimtare të projektit të zbatimit”.
Në vijim, Mëngra sqaron se DPSHTRR nuk ka hapur asnjë procedurë prokurimi me objektin e sipërpërmendur dhe asnjë procedurë prokurimi tjetër, përveç projektimit.
“Mes DPSHTRR-sw dhe institucioneve tw tjera nuk ka asnjw mungesw koordinimi pwr investimin e kwtij projekti, gjithashtu nuk ka as pwrplasje mes ndonjw institucioni dhe Drejtorisw sw Shwrbimit tw Transportit Rrugor pwr tw njwjtin investim”, shkruan Mwngra.
Pra, për Mëngrën nuk rezulton të ketë asnjë përplasje institucionale, megjithëse Fondi Shqiptar i Zhvillimit e anuloi procedurën 1.3 milionë euro, pikërisht për shkak të një projekti në zhvillim nga Drejtoria e Shërbimit të Transportit Rrugor.
Shifrat “sekret”
Mëngra duket se është i interesuar të luajë me lojra fjalësh, duke shmangur transparencën, edhe kur pyetet për fondet që ka prokuruar institucioni që ai drejton për projektin “Auto Moto Park”.
“Sa i përket fondit të prokuruar deri më tani nga DPSHTRR për këtë procedurë, ju informojmë që janë publikuar në faqen zyrtare të institucionit të Agjencisë së Prokurimit Publik (APP) dhe janë lehtësisht të verifikueshme”, deklaron kreu i institucion, Ilir Mëngra, për “Boldnews.al”.
Redaksia, e cila nuk kishte gjetur të dhëna në faqen zyrtare të APP-së para dërgimit të kërkesës për informacion, riverifikioi informacionin, bazuar në sugjerimin e kreut të DPSHTRR-së.
Kërkimi ishte sërish pa rezultat, pasi në portalin zyrtar të Agjencisë së Prokurimit Publik nuk gjendet asnjë e dhënë për tenderin/tenderat e zhvilluar nga Drejtoria e Shërbimir të Transportit Rrugor për projektin që lidhet me “Auto Moto Park” në Elbasan.
“Zero konflikt interesi”
Në vijim të interesimit të redaksisë, kreu i DPSHTRR-së, Ilir Mëngra, deklaron se “nuk ka evidentuar ose identifikuar interesimin e asnjë zyrtari të lartë, përfshirë ministër apo familjarë të afërt të tij, për shfrytëzimin e mjediseve ndihmëse të Auto-Moto Park”.
Kjo është përgjigja me garanci e titullarit të institucionit, i cili mohon në këtë mënyrë zërat se familjarë të një drejtuesi shumë të lartë institucional, me lidhje të hershme me DPSHTRR-në, kanë projektuar të jenë të pranishëm në hapësirat dytësore të projektit miliarda lekë.
Kjo përgjigje e Ilir Mëngrës pritet të vlerësohet në momentin kur projekti të ketë përfunduar ndërtimin dhe të bëhet funksionalë.
