Pas më shumë se 5 orësh, kryebashkiaku i Tiranës Erion Veliaj ka dalë nga ambientet e Prokurorisë së Posaçme ku dëshmoi në lidhje me dyshimet veprën penale të “korrupsionit pasiv”.
Ndërsa për gazetarët, Veliaj tha shkurtimisht se do të japë më shumë informacione në mbledhjen e Këshillit Bashkiak të Tiranës.
“Do t’ju shpjegoj nga mbledhja e Këshillit Bashkiak live”, tha shkurtimisht Veliaj.
Jashtë SPAK-ut ishin të mbledhur edhe një grup qytetarësh që protestuan kundër tij, teksa ai po dëshmonte para prokurorëve. Në momentin e daljes, efektivët e “Shqiponjave” u bënë gardh para protestuesve.
Burimet bëjnë me dije se Veliaj është thirrur në SPAK me kërkesë të prokurorit Ols Dado.
Ndërkohë në ambientet e jashtme të Prokurorisë së Posaçme në pritje të tij disa persona protestojnë kundër tij. Në sajë të këtyre hetimeve ka pasur kontroll personal ndaj familjarëve të zotit Veliaj.
Më 6 dhjetor 2024 SPAK sekuestroi telefonin e bashkëshortes së tij, Ajola Xoxa. Me vendim të GJKKO kontrolle u kryen dhe në studion ‘Harabel’ tek ish-Blloku ku u sekuestruan dhe dokumente që kanë të bëjnë me hetimet e nisura nga prokurori Olsi Dado, në lidhje me pasurinë e Erion Veliajt dhe familjarëve të tij.
Pas sekuestrimit të telefonit të bashkëshortes së Veliajt, SPAK u shpreh se janë ndërmarrë veprimet hetimore, ndërsa hetimi i nisur nga prokurori Dado është ende në faza paraprake.
Kjo është hera e dytë që Veliaj paraqitet në SPAK, pasi herën e parë u paraqit më 30 prill të këtij viti. Në atë kohë kryebashkiaku qëndroi për 8 orë në SPAK lidhur me hetimet e Prokurorisë së Posaçme për inceneratorin e Tiranës.
