Janë zbardhur detaje të reja nga ngjarja e regjistruar natën e kaluar në Pogradec, ku u shkrumbua një automjet tip “Volswagen”.
Mësohet se makina është në pronësi të ish-efektivit të Policisë, Leonard Dervishallari, teksa ngjarja ka ndodhur rreth orës 01:30, në fshatin Rrëmenj.
Makina e tij është djegur plotësisht, teksa flakët janë përhapur edhe tek dy automjete të parkuara afër saj, duke u djegur pjesërisht.
Policia e Korçës në një komunikatë për mediat tha se zjarri dyshohet se ka rënë aksidentalisht, por pronari i automjetit në një prononcim për mediat jep tjetër version.
Sipas tij, makina kishte 15 ditë që nuk lëvizte nga shtëpia e tij, duke e përjashtuar mundësinë e një zjarr rënie aksidentale. Leonard Dervishallari thotë se ka dyshime se zjarri është vendosur qëllimisht në automjet.
Njoftimi i Policisë:
Rreth orës 01:30, në fshatin Rrëmenj, dyshohet se aksidentalisht, ka rënë zjarr në automjetin tip “Volswagen”, në pronësi të shtetasit L. D. Si pasojë është djegur plotësisht ky automjet dhe pjesërisht 2 automjete të parkuara afër tij.
Grupi hetimor po punon për përcaktimin e shkakut të rënies së zjarrit.
