Prokuroria e Posaçme ka dorëzuar zyrtarisht kërkesën në Apelin e GJKKO, ku kundërshton vendimin e Gjykatës së Posaçme për lirimin e ish-kryeministrit, Sali Berishës nga masa “arrest në shtëpi”.
Dy prokurorët që po hetojnë çështjen “Partizani” janë Arben Kraja dhe Enkeleda Minollai, të cilët tashmë dosjen e kanë kaluar për gjykim në GJKKO. Seanca paraprake, nëse do të kalojë ose jo për gjykim po zhvillohet sot me gjyqtaren Flojera Davidhi, po e njëjta që i hoqi Berishës masën arrest në shtëpi më 27 nëntor.
Më 30 dhjetor 2023, Gjykata e Posaçme pranoi kërkesën e SPAK për ashpërsimin e masës së sigurisë dhe ndalimit të komunikimit për ish-kryeministrin dhe liderin e opozitës, Sali Berisha. Avokati i Berishës e cilësoi ndalimin e komunikimit si privim të lirisë për një deputet dhe e kishte paralajmëruar më herët apelimin e masës.
Sipas vendimit të gjykatës, Berisha urdhërohej të mos largohet nga banesa e tij si dhe të mos komunikojë me persona të tjerë. Kryedemokrati po hetohet për korrupsion pasiv në çështjen “Partizani”, ndërsa Prokuroria kishte kërkuar që Berisha të ketë kontakt vetëm me personat që jetojnë me të në të njëjtën banesë.
