Neymar nuk ka gjetur fatin që shpresonte në Arabinë Saudite, sidomos për shkak të një dëmtimi të rëndë që ia ka penguar karrierën në klubin e ri. Megjithatë, duke reflektuar për të kaluarën, ai nuk pendohet që e ka lënë PSG, pasi marrëdhënia e tij me klubin dhe tifozët ishte përkeqësuar në nivele ekstreme.
Trajneri dhe presidenti nuk ishin të kënaqur me të, ndërsa tifozët e kishin kthyer në objekt të urrejtjes së tyre, duke shkaktuar situata që Neymar ende i konsideron tronditëse.
Gjatë një interviste në podcast-in “Bartoli Time” të “RMC Sport”, Neymar ndau disa nga kujtimet e tij të vështira nga 6 vitet në Paris. Pavarësisht se ishte qyteti ku kishte qëndruar më gjatë gjatë karrierës së tij, largimi ishte shumë i trazuar, veçanërisht për shkak të marrëdhënies me tifozët që arriti në pikën e sulmeve dhe kërcënimeve pranë shtëpisë së tij:
“Për mua kjo ishte një padrejtësi, sepse gjithmonë kam dhënë gjithçka në fushë. Nuk mbaj mëri, por jam pak i trishtuar për mënyrën se si më trajtuan tifozët, sidomos kur vinin në shtëpinë time, kur përpiqeshin të hynin në pronën time, më fyenin ose përpiqeshin të më godisnin. Për mua e kaluan kufirin”.
Marrëdhënia mes tij dhe tifozëve u parizienë u shkatërrua plotësisht, duke e bërë të pamundur vazhdimin e qëndrimit të tij te PSG: “Nga ana e tyre nuk kishte më respekt, ndërsa unë gjithmonë i kam respektuar. Ishte një situatë vërtet e ndërlikuar. Në fund të fundit më vjen keq për mënyrën se si më trajtuan, por tashmë ka kaluar. Nuk kam mëri ndaj klubit, por ndjej njëfarë zhgënjimi ndaj njerëzve që menaxhojnë klubin dhe disa tifozëve”.
Pas këtyre ngjarjeve, Neymar e kishte marrë vendimin për t’u larguar nga Parisi. Megjithatë, surpriza ishte zgjedhja e tij për të shkuar në Arabinë Saudite, duke refuzuar oferta të tjera nga klubet kryesore europiane. Neymar iu bashkua Al-Hilal, një vendim që e shpjegon kështu: “Vendosa të largohesha nga PSG dhe më pas erdhi oferta nga Al-Hilal. E pranova menjëherë, pasi nuk isha më i lumtur te PSG. Klubi dhe trajneri nuk ishin më të kënaqur me mua”.
Vendimi për të lënë një klub të madh si PSG për një eksperiencë në Arabinë Saudite shënoi një kthesë të rëndësishme në karrierën e Neymar, duke reflektuar jo vetëm për futbollin, por edhe marrëdhëniet që mund të ndërlikohen mes një lojtari dhe tifozëve të tij.
