Analisti dhe gazetari Genc Burimi, në një intervistë të drejtpërdrejtë për News24, ka komentuar zhvillimet e fundit në Lindjen e Mesme pas përmbysjes së regjimit të Bashar al-Assad në Siri.
Burimi ka analizuar pasojat e kësaj situate për aktorët kryesorë ndërkombëtarë dhe ka theksuar pasigurinë që mbizotëron mbi të ardhmen e rajonit.
“Trump tha se ajo që po ndodh në Siri nuk është problemi i amerikanëve,” u shpreh Burimi, duke shtuar se kjo ka krijuar një atmosferë pasigurie, veçanërisht në Evropë, ku ka një panik të madh për pasojat që mund të ketë situata në Siri. “Në Evropë, sot gjermanët dhe austriakët kërkojnë të pezullojnë dhe dëbojnë refugjatët sirianë për shkak të ndryshimit politik në Siri,” shpjegoi analisti.
Burimi ka theksuar gjithashtu se ende nuk është e qartë se çfarë do të bëjnë amerikanët, duke u fokusuar te ndikimi i mundshëm i zhvillimeve në Lindjen e Mesme për politikën globale.
“Izraeli është më i fituari përkohësisht, duke u bashkuar me sunitët kundër shiitëve për të larguar pushtetin në Siri,” tha ai, por ka paralajmëruar se ky koalicion mund të krijojë një problem të ri për Izraelin në të ardhmen. “Nesër Izraeli mund të jetë përballë një krijese të frikshme sunite, që mund të kërkojë të krijojë një kalifat,” ka theksuar Burimi.
Në lidhje me rolin e Rusisë dhe Iranit, Burimi ka komentuar se Rusia, e cila ka mbështetur regjimin e Assad për shumë vite, ka dalë e diskredituar dhe e poshtëruar nga zhvillimet e fundit.
“Rusia sot është diskredituar dhe del e poshtëruar. Kjo është frikë edhe për Iranin, sepse nëse bombardohet nesër, mund të mos ketë ndihmën e Rusisë,” tha ai.
