Janë zbardhur detaje të reja nga hetimet për vrasjen e 28-vjeçarit Klaudio Prendi në zonën e “Xhamllikut” në Tiranë, të cilat tashmë janë marrë në dorë nga Prokuroria e Posaçme (SPAK), pasi dyshohet se është kryer nga një grup i strukturuar kriminal.
Burime për mediat bëjnë me dije se rreth dy javë pas atentatit, ka dhënë dëshminë për grupin hetimor dhe personazhi i njohur si “Kleo i Freskut”, i cili dyshohej se mund të kishte lidhje me ngjarjen.
Mësohet se bëhet fjalë për shtetasin me inicialet K.D., i cili në dëshminë e dhënë për grupin hetimor ka mohuar pretendimet e ngritura nga Policia, ku dyshohej se ai mund të ishte autor i ngjarjes.
Pas dëshmisë së dhënë, “Kleo i Freskut” është lënë sërish i lirë, teksa SPAK i ka sekuestruar aparatin celular dhe të dhënat që do të nxirren po shikohen me interes nga autoritetet.
Dyshimet ndaj “Kleos së Freskut” u ngritën nga ana e Policisë së Tiranës, pas një borxhi të pashlyer që kishte Klaudio Prendi ndaj tij, pasi ky i fundit dyshohet se administronte një “website” llotosh sportive online.
Ata janë konfliktuar me njëri-tjetrin rreth 5 ditë para se të ndodhte atentati ndaj Klaudio Prendit, në rrugën “Mustafa Matihiti”, e njohur ndryshe si “rrugica e Salës”.
“Kleo i Freskut” ka lidhje miqësore me dy vëllezërit, Erlis dhe Leonard Duka, ky i fundit i arrestuar dhe po gjykohet në SPAK për vrasjen e Santiago Malkos, ndërsa vëllai tjetër Erlisi, vijon të jetë në kërkim.
Konfliktin mes “Kleos së Freskut” dhe Klaudio Prendit, për shkak të atij borxhi, e ka konfirmuar dhe avokati i të dyshuarit, Enea Cenko, në një prononcim për Ora News.
‘’Një shoku i tyre i ka thënë që ka fituar një lloto prej 7600 euro. Në këtë shumë që është fituar nuk i është dhënë nga personi në fjalë. Ka pasur biseda për t’ja kthyer këtë shumë. Kjo në fillim nuk është konfirmuar nga i ndjeri, i ka thënë që nuk kam lidhje me këtë faqe”.
Gjithsesi, edhe avokati Enea Cenko e mohon që klienti i tij të ketë lidhje me ngjarjen.
“Atë ditë, klienti im, ‘’Kleo i Freskut’ ka qenë në një intinerar rruge dhe kohe që nuk korrespondojnë me ngjarjen në fjalë që është bërë atë natë pranë zonës së Xhamllikut” – thotë ai.
Klaudio Prendi u ekzekutua në një atentat mafioz me armë zjarri me silenciator pak pas mesnatës, rreth orës 00:30 të 19 nëntorit. 28-vjeçari, i cili njihej ndryshe me emrin Klajdi, ishte në një lokal në rrugën “Xhanfize Keko”, pranë kryqëzimit të “Oxhakut” në shoqërinë e disa miqëve të tij.
Makinën e tij ai e kishte parkuar para lokalit, aty ku ndodhet stacioni i urbanit të Porcelanit. Pasi është ndarë nga miqtë, ka dalë i vetëm nga lokali dhe është drejtuar për të hipur në makinë. Pikërisht në këtë moment ai është qëlluar 5 herë me një armë me silenciator. Atentatorët kanë qëlluar nga një automjet “Audi A4”, me targa greke të mbivendosura që vinte nga “Fresku” në drejtim të kryqëzimit ku ndodhi ngjarja.
I plagosur rëndë, me një plumb në kokë dhe një në gjoks, 28-vjeçari me origjinë nga Puka, u dërgua me urgjencë drejt spitalit të Traumës, por nuk arriti dot t’u mbijetonte plagëve të marra. Zemra e tij pushoi së rrahuri, në kohën që makina e atentatorëve po shkrumbohej nga flakët pranë liqenit të Farkës. Aty ku ata shkuan të pa shqetësuar dhe zhdukën çdo provë, bashkë me gjurmët e tyre.
Klaudio Prendi është djali i ish-gjyqtarit Fran Prendi dhe pistë e dytë është dhe ajo e verifikimit të informacioneve se ngjarja mund të ketë ndodhur për shkak të detyrës së babait të tij. Fran Prendi ka punuar për disa vite me rradhë si gjyqtar i Krimeve të Rënda dhe Gjykatës së Posaçme SPAK.
Të dhënat e siguruara nga policia kriminale flasin se kohët e fundit është liruar nga burgu një eksponent i botës së krimit, i cili në vitin 2018, u dënua me burg nga Gjyqtari Fran Prendi.
