Katër shtetase nga Kazakistani, Moldavia, Venezuela e Kolumbia janë vënë nën hetim nga seksioni i trafiqeve në Policinë e Vlorës, për akuzën e prostitucionit.
Policia e qytetit bregdetar bën të ditur se procedimi penal ka nisur ndaj A. A., 24 vjeç, banuese në Moldavi, F. S., 34 vjeç, banuese në Kazakistan, M. G., 38 vjeç, banuese në Venezuelë, C. J., 33 vjeç, banuese në Medellin, Kolumbi. Këto shtetase dyshohen se, në bashkëpunim me njëra-tjetrën, kanë ushtruar prostitucion në Vlorë dhe kanë përfituar vlera të ndryshme monetare.
Materialet në ngarkim të tyre i janë referuar edhe prokurorisë së rrethit, ndërsa hetimi ndaj tyre vijon në gjendje të lirë. Ky nuk është rasti i parë që në vendin tonë goditen raste të prostitucionit me protagoniste shtetase të huaja, të cilat e ushtrojnë kundrejt përfitimit të parave.
Kujtojmë se ditën e shtunë, një vend ku ushtohej prostitucion është zbuluar në Elbasan, ku u arrestuan shtatë persona nga Kolumbia e Spanja. Policia tha se në lagje të ndryshme të qytetit ata kishin përshtatur për shfrytëzim prostitucioni ambiente të marrë me qira. Po ashtu ata e promovonin këtë aktivitet në faqe online ku ofronin favore seksuale kundrejt pagesave.
Ndërkohë në kërkim janë shpallur 2 peruanët tutorë dhe një 31-vjeçare nga Venezula që do të hetohet në gjendje të lirë.
