Një shpërthim me tritol është regjistruar në orët e para të mëngjesit të kësaj të diele në zonën e “Ujit të Ftohtë” në qytetin e Vlorës.
Shpërthimi është regjistruar rreth orës 05:30 në ambientet e jashtme të lokalit “The Boss” që ndodhet në shëtitoren buzë detit. Si pasojë e shpërthimit deri më tani raportohet vetëm për dëme të konsiderueshme materiale.
Mësohet se lokali “The Boss”, i cili funksiononte si bar, restorant dhe piceri, nuk kishte funksionuar prej kohësh, por kishte vetëm pak ditë që ishte rihapur.
Pjesa ballore e lokalit e cila rezulton të ketë qenë me xham është thyer dhe dëmtuar si pasojë e shpërthimit. Ambienti ka qenë i survejuar me kamera, por ende nuk dihet nëse ato kanë filmuar autorin apo jo.
Nuk ka asnjë informacion për autorët, ndërsa Policia dhe grupi hetimor shkuan në vendin e ngjarjes dhe po punojnë për të zbardhur rrethanat.
