Presidenti i sapozgjedhur i SHBA-së, Donald Trump njoftoi të enjten se do të emërojë biznesmenin David Sacks në postin e ri për çështjet që lidhen me inteligjencën artificiale (AI) dhe kriptovalutat.
“Ai do të punojë në një kornizë ligjore në mënyrë që industria e kriptove të ketë qartësinë që ka kërkuar dhe të mund të lulëzojë në SHBA”, tha Trump në një postim në rrjetin social Truth Social.
David Sacks do të jetë përgjegjës për formimin e politikave në fushën e AI dhe kriptomonedhës dhe do të sigurojë dominimin e Amerikës në dy fushat me zhvillim të shpejtë.
Trump, i cili dikur e quajti kripto-n si një mashtrim, përqafoi asetet dixhitale gjatë fushatës së tij, duke premtuar se do ta bënte SHBA “kryeqytetin e kriptove të planetit” dhe do të grumbullonte një rezervë kombëtare bitcoin.
Sacks është partner në Craft Ventures, një fond kapitali sipërmarrës që ai bashkëthemeloi në fund të 2017. Ai është i lidhur ngushtë me Elon Musk dhe e ka ndihmuar në tentativën e tij për të blerë Twitter, platforma e mediave sociale të riemërtuar X.
