Pak ditë më parë kryeministri Edi Rama përmes një statusi në rrjetet sociale lajmëroi nisjen e punimeve për ndërtimin e Parkut Urban në Spitallë të Durrësit, që sipas tij do ta kthejë këtë zonë në një hapësirë rekreative në shërbim të qytetarëve, me gjelbërim të shtuar, zonë për këmbësorët, pistë biçikletash, terrene sportive dhe zonë të dedikuar për fëmijë.
Në fotot e publikuara nga Edi Rama, ajo që bie në sy është se në njërën prej tyre, parku duket se kalon mes për mes varrezave.
Ndërsa kryetarja e Bashkisë Durrës Emirjana Sako në faqen e saj zyrtare në internet i bën këtë prezantim ‘PARKUT URBAN’ Spitallë:
‘PARKU URBAN’ Spitallë konsiston në mbylljen e kanalit të ujërave të larta në zonën e Spitallës (1300 ml) dhe shndërrimin e zonës në një ‘Park Urban linear’ (3-4 ha) ku do të krijohet një kurorë e gjelbër me mbjelljen e pemëve, do të ndërtohen fusha sportive, kënde lojërash për fëmijë si edhe hapësira rekreative për të gjitha grup-moshat. Fondi Shqiptar i Zhvillimit në cilësinë e autoritetit kontraktor zhvilloj pak muaj më parë procedurën e tenderit me objekt “Ndërhyrje në hapësira urbane, parqe, lulishte, shëtitore etj, lot i i parë për Parkun Urban Spitallë”, me fond limit: 1.3 miliard Lekë.
Fitues i tenderit u shpall operatori ekonomik “ED KONSTRUKSION” me ofertë 913 milion lekë pa TVSH. Duke shtuar TVSH -në vlera e parkut i kalon 1 miliard lekë. Studimi dhe projektimi i parkut urban Spitallë” është përgatitur nga bashkimi i operatorëve “IDEAL CONSULTING AND PROJECTION shpk &HYDRO-ENG CONSULTING shpk, të dyja kompani me qendër në Durrës. Por a do të kaloj parku vërtetë mes për mes varrezave?
Në studim projektimin e këtij parku, pjesë e dokumentave të tenderit thuhet: “Gjurma e projektit kalon përmes një zone urbane si edhe varrezave të vjetra të qytetit të Durrësit.
Toka ku do të zhvillohet projeki është mbi kanalin e reabilituar te KUL (Kanali i mbyllur me strukturë Beton-arme), përgjatë parkut ka intersektime me rrugët automobilistike, kalon përmes zonës së varrezave”. Pra siç zbulojnë dokumentat parku do kaloj mes për mes varrezave të vjetra të Durrësit, të cilat po t`i shohësh nga google map janë parcela të cilat zënë hapsira të konsiderueshme.
“Në 1 kilometër gjatësi ka në mos gaboj, nja 300-350 metra që është pjesa e varrezave- u shpreh projektuesi i parkut ne nje bisede me gazetaren e “Xhadave”, duke pranuar faktin e çuditshëm se Shqipëria, do ketë parkun e parë urban të të gjallëve, mes varrezave në Durrës./MCN
