Gjykata e Gjirokastrës ka dënuar me 6 vite burgim ish-kreun e Kadastrës së këtij qyteti, Florian Taçi, por për shkak të gjykimit të shkurtuar atij i është ulur dënimi në 4 vite e 6 muaj burgim.
Taçi është shpallur fajtor për falsifikim, mashtrim dhe shpërdorim të detyrës në bashkëpunim.
Vendimi është marrë nga gjyqtarja Matilda Përralla, e cila ka dënuar dhe dy bashkëpunëtorët e Taçit, inxhinierin Julian Nakuçi dhe ish-topografin e Kadastrës, Alban Memishaj.
Ata janë dënuar me nga 4 vite burgim, por për shkak të gjykimit të shkurtuar dënimi iu është ulur në 2.5 vite burgim.
Florian Taçi u arrestua më 28 shkurt të këtij dhe më pas u la në masën e sigurisë “Arrest në shtëpi” nga Apeli i Përgjithshëm në muajin Mars, ku po qëndron prej 7 muajsh.
Të tre shtetasit e mësipërm në bashkëpunim me njëri-tjetrin akuzohen se kanë përpiluar plane rilevimi dhe raporte vlerësimi pronash me licenca të falsifikuara.
Florian Taçi kishte regjistruar një sipërfaqeje prej 122 hektarësh kullotë, me vendndodhje në vendin e quajtur “Stojan” të Libohovës me qëllim favorizimin e subjektit “FAETHON”, sh.p.k.” për marrjen me qira të kësaj sipërfaqeje për 98 vjet për ndërtimin e një parku fotovoltaik, duke cenuar të drejtat e pronësisë së disa shtetasve.
Lidhur me këtë projekt, më 14 shkurt 2024 qeveria kishte miratuar në mbledhjen e Këshillit të Ministrave ndërtimin e centralit. Kjo pjesë toke tashmë është vendosur në sekuestro-preventive.
Policia ka ushtruar kontroll në zyrën avokatore të Florian Taçit në Gjirokastër, ku ka sekuestruar dokumente të shumta që i shfrytëzonte Taçi dhe që kishin të bënin me të gjithë databazën e Kadastrës së Gjirokastrës. Njëkohësisht Taçi kishte akses në këtë databazë online.
