Gazetari Klodian Tomorri, përmes një postimi në rrjetet sociale ka ngritur pyetjes se pse SPAK nuk e konfiskon kompaninë “Viola Green”, ku një prej aksionerëve kryesorë është Bujar alias Marsel Shega.
Ndaj këtij të fundit u lëshua urdhër-arresti, pasi akuzohet për trafik ndërkombëtar të lëndëve narkotike dhe si “truri financiar” i grupit kriminal të Suel Çelës së Elbasanit.
Tomorri shkruan se “Viola Green” është një kompani që merr miliona euro tendera pastrimi nga bashkitë e Elbasanit, Rrogozhinës dhe Kuçovës. Gazetari paralajmëron se situata me këtë kompani do të ndodhë njësoj si me ato të inceneratorëve, se kur u kujtua SPAK për t’i sekuestruar gjeti 0 euro në llogari.
Postimi i plotë i Klodian Tomorrit:
SPAK thotë në dosje se biznesmeni Bujar aka Marsel Shega ishte truri financiar që pastronte paratë e një prej organizatave më të fuqishme të trafikut në Shqipëri.
Bujar Shega është aksioneri më i madh dhe njëkohesisht administratori i kompanisë Viola Grën.
“Viola Green” është një kompani që merr miliona euro tendera pastrimi nga bashkitë e trekëndëshit Elbasan, Rrogozhinë, Kuçovë.
Tani këtu kuptohet një gjë e qartë. Krimi ka hyrë fuqishëm në kontratat publike dhe ndan paratë e buxhetit. Qeveria në këtë rast shërben si pastruese parash i dorës së fundit, pasi pastron dhe ligjëron asetet e krimit. Dhe ky është fenomen dominant në kontratat publike të Shqipërisë.
Pyetja tani është kjo. Kur SPAK thotë vetë që zoti Shega ishte truri financiar i organizatës kriminale të Suel Çelës, pse nuk e sekuestron kompaninë “Viola Green”? Ose të paktën pjesën e aksioneve të atij që e akuzon si pastrues parash.
Apo është varianti i inceneratorit? Lajmerojmë njëhere dhe presim. Pastaj kur na mbushet mendja për të sekuestruar kompaninë, gjejmë opingat e Sheros në llogari bankare. Kjo ndodhi me inceneratorin e Tiranes.
Është turp që një kompani me pronar të arrestuar si nje nga pastruesit më të medhenj të parave në vend, vazhdon të marrë para publike. Para një jave u paguan miliona lekë për “Viola Green” nga buxheti.
Kapni paratë të nderuar prokurorë.
Statistikat e parave vlejnë shumë më tepër se statistikat e njerëzve që arrestohen. Të jeni të sigurtë për këtë.
Nëse do të ndodhë edhe me “Viola Green” ashtu si me inceneratorin, pastaj nuk është më rastësi. As paaftësi. Është qejf. Edhe hidhni naj sy se si i mori tenderat “Viola Green” nga Memolla, Hajdari i Kuçovës dhe hajdaret e tjerë të Rilindjes.
