Avokati dhe aktivisti Elton Laska nënvizon në një reagim në Facebook se vrasja e Fatmir Dedjas e ka çuar në 9 numrin e viktimave të krimit në një hark të shkurtër kohor prej vetëm një muaji.
Laska thekson se pavarësisht këtij bilanci tragjik vrasjesh, Policia e Shtetit nuk e ka prioritet rendin dhe sigurinë, por zgjedhjet e ardhshme.
Laska shprehet se shqiptarët ndihen të pasigurt, të pambrojtur përballë krimit, mungesës së drejtësisë dhe rasteve të vetëgjyqësisë.
Ai i bën thirrje qeverisë Rama të angazhohet seriozisht për të garantuar rendin dhe sigurinë e qytetarëve.
Postimi i plotë:
Vrasja e Fatmir Dedjas në Tiranë e ka çuar në 9 numrin e viktimave të krimit në një hark të shkurtër kohor prej vetëm një muaji.
Seria e ngjarjeve tragjike nisi me masakrën në Dobraç, ku mbetën të vrarë 4 persona. Vazhdoj me ekzekutimet mafioze të Klajdi Prendit dhe Eduart Reçit në Tiranë, vrasja e Martin Canit pranë derës së shkollës, një tjetër viktimë në Tropojë dhe së fundmi një tjetër vrasje në Ndroq të Tiranës.
Pavarësisht këtij bilanci tragjik vrasjesh, Policia e Shtetit mesa duket nuk ka prioritet rendin dhe sigurinë, por zgjedhjet e ardhshme.
Sot, qytetarët shqiptarë ndihen të pasigurt, të pambrojtur përballë krimit, mungesës së drejtësisë dhe rasteve të vetëgjyqësisë.
Është koha që qeveria të lërë mënjanë krahasimet statistikore me vitet 2013 apo 1990 dhe të angazhohet seriozisht për të garantuar rendin dhe sigurinë e qytetarëve.
