Depozitat e ujit të vendosura në tarracat e pallateve vazhdojnë të përbëjnë një problem në Tiranë, pavarësisht Vendimit të Këshillit Bashkiak të miratuar 5 vite më parë për heqjen e tyre. Banorët e kryeqytetit argumentojnë se këto depozita janë të domosdoshme për shkak të furnizimit të kufizuar me ujë. Ndërkohë, institucionet përgjegjëse pranojnë se ende nuk është gjetur një zgjidhje për këtë situatë.
Në dhjetor të vitit 2019, Këshilli Bashkiak i Tiranës miratoi vendimin për heqjen e depozitave nga tarracat e pallateve. Në fjalën e mbajtur gjatë mbledhjes së Këshillit Bashkiak, kryetari i Bashkisë, Erion Veliaj tha ndër të tjera: “Së pari, marrim vendim për të hequr të gjitha depozitat e ujit nga tarracat, jo për t’i lënë pa alternativë, por që në bashkëpunim me administratorët e pallateve të kenë mundësi që, si pallatet e reja, në hapësirën e përbashkët në katin e parë ose në një nga vendet e parkimit, të instalojnë një depozitë të përbashkët për të gjithë banorët”.
Por, si është situata në terren 5 vite pas këtij vendimi? Një verifikim i Faktoje.al në terren tregon se depozitat në tarracat e pallateve të vjetra vijojnë të jenë ende një problem në kryeqytet.
Mungesa e furnizimit të qëndrueshëm me ujë dhe sfidat infrastrukturore bëjnë qe procesi te jete më kompleks, pasi shumë banorë ende mbështeten tek depozitat për të siguruar furnizimin e rregullt me ujë
Banorë në zonën e “Ali Demit” në kryeqytet thonë se janë të detyruar që t’i mbajnë depozitat, pasi nuk ka furnizim të vazhdueshëm me ujë.
“Nuk e dimë kur vjen dhe kur ikën uji, sepse kemi depozitat që të mos na mungojë. Në dimër situata është më mirë, por në verë detyrohemi të blejmë edhe bote me ujë, sepse ka mungesa të mëdha”, thotë Mira, banore në këtë zonë.
Edhe në zonën e Rrugës se Elbasanit, në rrugën “Jan Kukuzeli” ka ende pallate të vjetra që kanë mbi tarraca depozitat.
“Nëse nuk kemi ujë 24 orë, si t’i heqim depozitat?! Duhen ndryshuar shumë gjëra që të heqim depozitat, të gjejmë një hapësirë ku mund t’i vëmë, nuk është kaq e lehtë”, thotë një e moshuar, banore në “Rrugën e Elbasanit”.
Gjithashtu, në zonën pranë gjimnazit “Petro Nini Luarasi” në pallatet e vjetra të zë syri depozitat mbi tarracë.
Pse nuk është zbatuar VKB?
Në lidhje më këtë shqetësim, Faktoje.al iu drejtua me një kërkesë për informacion edhe Bashkisë së Tiranës. Ne morëm një përgjigje për çështjen në fjalë nga Inspektoriati i Mbrojtjes së Territorit, i cili pranon se situata nuk ka marrë zgjidhje.
“Kryerja dhe zbatimi i këtij vendimi bashkiak nënkupton përfshirjen e disa strukturave apo edhe aktorëve institucional me qëllim bashkëveprimin dhe bashkërendimin në raport me situatën faktike.
Gjithashtu, VKB-ja nr.150 përveç strukturave institucionale të përcaktuara në të, përfshin edhe rolin e asamblesë së bashkëpronarëve apo edhe administratorëve të pallateve me qëllim finalizimin dhe zbatimin e kushteve operacionale paraprake”, argumenton IMT.
Më tej, Inspektoriati shton: “Për sa i përket rolit të IMT Bashkia Tiranë, ju theksojmë se pa u plotësuar kushtet e mësipërme të sipërcituara, apo edhe në mungesë të informacioneve të cilat duhet të ishin përcjellë dhe administruar praë IMT Bashkia Tiranë, nga ana e IMT-së nuk mund të ndërmerret asnjë veprim mbështetës lidhur me zbatimin e këtij vendimi”.
Ujësjellës Kanalizime Tiranë tha për Faktoje.al se qyteti furnizohet me ujë mestarisht 17 orë në ditë, duke theksuar se më problematike janë zonat periferike të kryeqytetit.
“Koha mesatare e furnizimit me ujë në qytetin e Tiranës është 17 orë. Zonat që nuk kanë ende furnizim 24 orë me ujë janë zonat periferike të Tiranës. Zonat, të cilat janë me kuota më të larta dhe zonat që kanë dendësi të lartë të objekteve (shtëpi banimi). Këto zona hasin probleme me furnizimin me ujë gjatë periudhës gusht-shtator, për shkak të rënies së prurjes së burimeve. Vetëm gjatë sezonit të verës kanë kufizime në oraret e furnizimit me ujë, sipas një regjimi të përcaktuar për të mundësuar furnizimin optimal në të gjithë njësitë administrative”, sqaron UKT.
Depozitat mbi pallate dhe rreziqet
Inxhinieri Erion Softa thekson se në Tiranë asgjë nuk ka ndryshuar, pavarësisht Vendimit të Këshillit Bashkiak të 2019-s. Ai tregon rreziqet që vijnë si pasojë e mbajtjes së depozitave mbi tarraca.
“Gjendja duket nëpër Tiranë, tarracat janë të mbushura me depozita. Gjendja nuk ka ndryshuar, është e njëjta gjë. Rreziku është shumë i madh në rast të lëkundjeve sizmike bien nga strukturat në të cilat janë vendosur dhe bëjnë dëme të pallogaritshme. Për të mos krijuar dëmtime në tarracët janë vendosur në kafazin e shkallëve dhe përveç kësaj soletat nuk janë llogaritur të bëjnë ngarkesa të përqendruara në ato zona”, argumenton Softa.
Mirëpo, sipas inxhinierit këto depozita janë edhe një burim rreziku për shëndetin.
“Depozitat kanë edhe një dëm të madh shëndetësor, pasi për shkak të ujit të kontaminuar krijojnë alga, baktere të dëmshme, sepse qytetarët nuk i pastrojnë depozitat dhe një pjesë e madhe e tyre janë të mbushuara edhe me materiale inerte, sepse uji vjen i kontaminuar me kripëra, materiale të ndryshme dhe ato aty depozitohen”, theksoi ai.
Sipas inxhinierit, çështja e ujit në Tiranë është një “çështje që me kalimin e viteve rëndohet për shkak të objekteve të reja, të cilat në rastin më të mirë llogariten vetëm si kondicone urbane, por nuk llogariten në rritjen e densitetit të popullsisë, infrastrukturën rrugor, furnizimin me ujë, shkarkimet e ujërave të zeza dhe evakuimin në rastet e fatkeqësive natyrore”.
/Faktoje
