Të shtëna me armë zjarri janë regjistruar këtë të diel në Ndroq.
E gjithë ngjarja ndodhi rreth orës 15:30 në një lokal në zonën e Ndroqit ku viktima ishte duke konsumuar një drekë me disa miq të tij.
Në atë moment në ambientet e lokalit u fut edhe i riu Julian Gjoshi, i cili rezulton të ketë qenë mik me 50-vjeçarin. Në momentin që e pa ky i fundit u ngrit nga tavolina dhe shkoi ta përqafojë, mirëpo 27-vjeçari nxori armën dhe pa i thënë asnjë fjalë filloi ta qëllonte.
Viktimë ka mbetur shtetasi i identifikuar si Alfred Dedja. Viktima është banor i zonës, ndërsa dyshohet se ngjarja ka te beje me prishjen e pazareve të drogës.
Policia ka identifikuar autorin e vrasjes, i cili është afruar në këmbë kur ta kryer krimin dhe më pas është larguar me një makinë tip “Benz” të zi (ML).
Sipas burimeve të policisë autori i dyshuar për krimin e rëndë është shtetasi i identifikuar Julian Gjoshi, nga Shijaku.
Julian Gjoshi është kunati i Altin Hajrit, i cili rezulton në kërkim nga policia prej 4 vitesh për përfshirjen në zhdukjen e Jan Prengës në vitin 2020. Ndërsa, viktima vite më parë ka qenë menaxher tek “Golden Resort”, i cili është në pronësi të Altin Hajrit.
Kunati i Altin Hajrit, emër i njohur i botës së krimit pasi kishte lidhje edhe me ish-deputetin Jurgis Çyrbja.
Emri i Julian Gjoshit ka dalë në aplikacionin e koduar “SKY ECC” kur Altin Hajri diskutonte me ish-deputetin Jurgis Çyrbja për arrestimin e tij në vitin 2021 në Tiranë.
Gjoshi ishte dënuar në 23 dhjetor nga Gjykata e Tiranës për akuzën e “Mbajtjes pa lejë të armëve të zjarit dhe municionit” dhe “Drejtimin e mjetit në gjendje të dehur”. Edhe në këtë rast, Hajri ofronte para që pistoleta që kishte kunati i tij me vete të konsiderohej “e paaftë” për qitje. Çelësi për ndryshimin e akuzës ishte testi balistik që do të bënte Policia e Shtetit.
- Pamje nga vendi i ngjarjes
- Çfarë njofton policia
Policia ka dhënë informacion zyrtar për vrasjen në Ndroq të Tiranës.
Efektivët shprehen se viktimë ka mbetur shtetasi Alfred Dedja rreth 50 vjeç. Autori i dyshuar është identifikuar dhe po punohet për kapjen e tij.
“Më datë 01.12.2024, rreth orës 15:30, në një lokal në Ndroq, në rrethana ende të paqarta është vrarë me armë zjarri shtetasi A. D., rreth 50 vjeç. Autori është identifikuar nga shërbimet e Policisë dhe një grup i posaçëm hetimor, në drejtimin e Prokurorisë, po vijon punën për zbardhjen e plotë rrethanave të ngjarjes, dokumentimin e plotë ligjor të saj dhe kapjen e autorit të dyshuar”, njofton policia.
