Një “shtëpi bari” është zbuluar nga autoritetet policore në Vaun e Dejës e ndërtuar në një pronë publike. Më konkretisht, bëhet fjalë për një godinë publike të braktisur prej vitesh në fshatin Dush, e cila ishte përshtatur për kultivim të bimëve narkotike
Aty është ushtruar kontroll nga uniformat blu në kuadër të operacionit policor të koduar “Godina” dhe si rezultat brenda saj janë gjetur 578 fidanë kanabis sativa në kubikë dhe në vazo si dhe 103 llamba elektrike që shërbenin për realizmin e kësaj veprimtarie kriminale.
Burime bëjnë me dije se godina e cila ishte kthyer në shtëpi bari vite më parë ka shërbyer si shkollë 9-vjeçare për fshatin dhe zonën për rreth.
Ndërkohë, në vijim të operacionit, Policia bën me dije se ka arrestuar vetëm elektricistin e zonës dhe ka proceduar penalisht tre punonjësit e tjerë të OSHEE-së që mbulonin zonën, teksa ende nuk dihet se kush janë autorët.
“Në vijim të veprimeve u arrestua shtetasi F. M., 62 vjeç, banues në Laç, elektricisti i zonës, dhe u proceduan penalisht në gjendje të lirë shtetasit J. D., 41 vjeç, banues në Fushë- Arrëz, I. M., 32 vjeç, banues në Shkodër dhe A. B., 32 vjeç, banues në fshatin Hajmel, (grup i punës i OSHEE-së që mbulon zonën) për veprat penale “Shpërdorim i detyrës”, “Kultivimi i bimëve narkotike” dhe “Vjedhja e energjisë elektrike”.” – thuhet në njoftimin e Policisë.
Autoritetet policore bëjnë me dije se nën drejtimin Prokurorisë , strukturat hetimore të Komisariatit të Vaut të Dejës dhe ato të Policisë së Shkodrës vijojnë punën për identifikimin dhe kapjen e autorëve.
Materialet i kaluan Prokurorisë për veprime të mëtejshme.
