Edhe në rastet e infeksionit dhe sëmundjes, duket se çdo e keqe e ka një të mirë. Shkencëtarët kanë zbuluar se një infeksion i rëndë me Covid-19 nxit prodhimin e një qelize të fuqishme antikancerogjene që mund të tkurrë tumoret.
Sipas një studimi të botuar në “Journal of Clinical Investigation”, këto qeliza janë efektive edhe në tkurrjen e tumoreve të avancuara të fazës së katërt.
“U befasuam kur e pamë këtë,” tha dr. Ankit Bharat, shefi i kirurgjisë torakale në Northwestern Medicine, i cili udhëhoqi kërkimet mbi minjtë që çuan në këtë zbulim. “Këto qeliza kanë veti të fuqishme luftuese kundër kancerit dhe janë shumë efektive në migrimin drejt vendeve ku ndodhet kanceri.”
Hulumtuesit besojnë se ky zbulim hap rrugën për terapi të reja me ilaçe që aktivizojnë qelizat luftuese kundër kancerit të quajtura monocite. Ata gjithashtu mendojnë se këto terapi të reja do të jenë më efektive dhe me efekt më të gjatë sesa imunoterapitë aktuale të kancerit, të cilat ndihmojnë vetëm 20%-40% të pacientëve.
Agjent sekret kundër kancerit
“Monocitet nuk e vrasin drejtpërdrejt kancerin, por funksionojnë si një ‘agjent sekret’, duke u maskuar si qeliza ‘miqësore me kancerin’, gjë që u lejon atyre të arrijnë në zemër të kolonive të kancerit,” tha Bharat. “Kur mbërrijnë atje, ato prodhojnë një kimikat që i sinjalizon qelizat NK (natural killer) për vendndodhjen e tyre.”
Përdorimi i monociteve dhe qelizave NK do të rrisë efektivitetin e imunoterapive antikancerogjene, pasi nuk ka mënyra të njohura shkencore që qelizat e kancerit të bëhen rezistente ndaj tyre. Bharat tha: “Jemi shumë të entuziazmuar dhe optimistë për këtë. Brenda nesh kemi ushtrinë më të fuqishme në botë; thjesht duhet të kuptojmë si ta përdorim më mirë për të luftuar kancerin.”
Justin Stebbing, profesor i shkencave biomjekësore në Universitetin Anglia Ruskin në Mbretërinë e Bashkuar, tha se implikimet e këtij studimi shkojnë përtej Covid-19 dhe kancerit. Duke shkruar në “The Conversation”, ai theksoi: “Tregon se si sistemi ynë imunitar mund të trajnohet nga një lloj kërcënimi për t’u bërë më efektiv kundër një tjetri. Ky koncept, i njohur si ‘imunitet i trajnuar’, është një fushë emocionuese kërkimi që mund të çojë në trajtime të reja për një sërë sëmundjesh.”
Megjithatë, Stebbing theksoi se njerëzit nuk duhet të kërkojnë infektimin me Covid-19 si një mënyrë për të luftuar kancerin. “Covid-19 i rëndë mund të jetë kërcënues për jetën dhe ka pasoja të rënda afatgjata për shëndetin.”
Shkencëtarët shtuan se nevojiten më shumë kërkime, dhe dr. Bharat tha se hapi i ardhshëm do të jetë kryerja e provave klinike.
