Disa ditë më parë emisioni “Stop” transmetoi problemin e zotit Dritan Llalla, një emigrant shqiptar në Greqi, i cili thotë se është mashtruar nga kryetari i shoqatës së emigrantëve shqiptarë, Arben Cani në Athinë.
Ky i fundit i premtoi t’i bënte disa dokumente të gruas, të cilat nuk i mbylli. Dritani pagoi 800 Euro si fillim dhe pas gati 4 vjetësh, as ka mbaruar punë e as ka marrë paratë.
“Jam i mashtruar nga kryetari i shoqatës sonë (i emigrantëve shqiptarë), nga Arben Cani në Athinë, për të më bërë disa dokumenta të gruas sime, të cilat nuk i mbylli fare. Kam paguar 800 euro, si fillim. Kanë kaluar mbi tre vjet, afër 4 vjet dhe nuk dëshiron as të flasë. Në fillim më gënjente: ‘Do të t’i kthej’, kurse tani as që dëshiron të flasë fare. M’u tregua njeri i thjeshtë, i ndihmës, më tregonte ndihma, çfarë kishte bërë. Është taksixhi. ‘T’i bëj unë kollaj’, tha ai. ‘Më dërgo këto e ato’. Si paradhënie, 750 euro. I dhashë 800. Ai kërkonte 1500 euro në total,” ka thënë për mikrofonin e “Stop” denoncuesi, Dritan Llalla.
Në komunikimin e fundit me Arbenin, ky i fundit thotë se do ia kthejë paratë, por ka pasur probleme.
Arben Cani: E ke shumë gabim, shoku! Unë kam probleme shumë serioze.
Denoncuesi: Po cfarë të them unë? Ti, do, që të t’i fal?
Arben Cani: Kam shumë probleme, jo probleme, vëlla!
Ndërsa në komunikim me gazetarin e “Stop”, Arbeni kërcënon me gjyqe në gjykatat greke.
Arben Cani: Nuk keni të drejtë të incizoni biseda. Individuale, nuk keni… Ndryshe, do i drejtohem unë organeve kompetente greke e jo shqiptare.
“Stop” kontaktoi sërish me zotin Dritan Llalla pas transmetimit dhe ai i lumtur tha, se kishte arritur të merrte paratë e veta falë emisionit tonë.
“Mbasi doli në emisionin “Stop” denoncimi, që bëra, pas ca ditësh më dërgoi lekët dhe e mbyllëm me kaq. Në rregull çdo gjë, ai në rrugën e tij, unë në rrugën time dhe për të gjitha këto kuptohet falënderoj emisionin “Stop”, Saimirin, Gentin, ty si gazetar, të gjithë stafin, një falënderim të madh nga ana ime! Atje po shkonte, drejt humbjes së këtyre lekëve. Faleminderit edhe juve e sidomos për ne emigrantët këtej, na ndihmoni shumë, se i kemi dy herë më të vështira gjërat sesa në vendin tonë, në Shqipëri,” falenderoi denoncuesi, Dritan Llalla./tvklan
